上周五美股未有就鮑爺於Jackson Hole上發表偏鷹嘅講話下跌，反映標指回試4300水平找到支持後反彈，重返4400水平，當晚回升29點；道指升247點，納指更升接近1%。至於兩度升至17危險警界線嘅VIX，又回落至15水平左右，反映美股暫時唔似有大跌風險，反而喺高位徘徊整固。
至於港股當晚夜期變化唔大，於18000水平徘徊，不過周日阿爺出招救市，內地今日起將證券印花稅減半， 同時下調孖展門檻，以刺激成交，增強內地股市流動性。與此同時，內地亦同時公布，「根據近期市場情況，階段性收緊IPO(首次公開招股)節奏，促進投融資兩端的動態平衡」，擺明防止更多新股上市攤薄現有於市場投資嘅資金，並且為房地產股本融資創造機會。另一方面，中證監又稱，充分考慮市場關切，認真研究評估股份減持制度，現規定一間上市公司若存在破發、破淨，或者最近3年未派過息、累計現金分紅金額低於最近3年年均淨利潤30%，「控股股東、實際控制人不得通過二級市場減持本公司股份。」同時，從嚴控制其他上市公司股東減持總量，引導其根據市場形勢合理安排減持節奏；鼓勵控股股東、實際控制人及其他股東承諾不減持股份或者延長股份鎖定期。
今次阿爺出嘅招都算係咁，市場亦憧憬港股呢邊會唔會跟住阿爺走，嗱嗱聲減印花稅，不過波叔呢排一心想搞夜市，暫時未有表示會跟隨阿爺減印花稅，希望司長好好考量一下，減咗交易成本，係刺激港股成交回升，最快捷同最直接嘅方法。希望港府後知後覺，都好過不知不覺。
恒指高開562點，最多曾升608點，見18564半日高位，其後升幅逐步收窄，至中午升幅已削半。恒指中午報收18256，升299點，國指升127點，報6303；恒科指半日升110，報收4169。半日成交額略增至633.44億元。不過以全日計，成交唔重返1200億或以上，港股都係缺水，升勢難以持續。
今日藍籌股普遍向上，但高開低走，又係割韭菜咁嘅格局，真係不提也罷，最明顯係受惠減印花稅嘅內地券商股，全線高開低走，半日升幅何止削半，幾乎打回原形。阿爺出招叫大家出嚟衝，但阿爺自己除咗打嘴炮，照樣係仙都唔仙，目前阿爺所謂救市，主要係補住內銀平平安安唔好爆雷，因為內房債務問題，一旦波及內銀，咁就真係乜都死。
麥狄文
(徐狄怡‧證監會持牌人)
