隔晚市場焦點係Nvida業績，憧憬好過預期，股價急升逾8%，帶動科技股向上。道指就跌少少，埋單唔見36點；標指跟納指分別升30點及206點，標指回調至舊年8月反彈高位4325後回升，已重返4400水平，VIX喺17水平徘徊，反映市場恐慌程度未見上升。隔晚美股係靠Nvidia同埋Tesla兩股反彈帶動科技股造好，但息口問題仍然困擾大市。
恒指高開18點，半日最多升179點，見17802，但連17800水平都未能企穩，唔單止抹去所有升幅，更倒跌29點，見17593半日低位。但A股一度回升，帶動港股回升逾百點，可惜A股半日收市前再度受壓倒跌，港股升幅亦大大收窄，半日僅升28點，收報17652；國指升5點，報6036；恒科指升16點，收3939。半日成交額只有454.93億元，持續低迷嘅成交，反映港股即使從上月高位回落超過2500點，仍未有資金願意入場趁低吸納，係港股估值唔夠低，抑或沒有最低，只有更低，大家應該心中有數。港股已連跌七個交易日，目前於17600水平好淡爭持，但跌勢未有扭轉，只係稍作喘息。
人民幣低位反彈，有消息指人行沽出美元買入人民幣維持秩序，金融股隨住人民幣反彈而略為回升，只有港交所(00388)半日仍跌0.5%，平保(02318)跌0.8%，其他內銀股升0.6%至1.5%不等；大笨象(00005)半日升0.4%；友邦(01299)彈1.1%。
雖然內銀股估值已去到歷史低位水平，不過睇返最近阿爺繼續放鬆銀根，但銀行拆借市場，一年期LPR只降10個基點，5年期不變，反映銀行對長貸唔多願減息，短貸降幅亦跟唔足央行下調幅度，經過年初大量放貸畀業主，以新貸償還舊貸後，銀行息差已明顯收窄，部份銀行息差已少於180基點，即係銀行借貸要面對風險大幅增加，但息差卻收窄，借貸生意愈嚟愈難做，基本上銀行都唔多願再放貸。再加上內房債務危機一旦處理唔好，一個唔覺意拖垮埋內銀，呢個係內銀股持續低迷嘅原因，愈平愈無人願意買。
科網股則個別發展，幾大巨頭半日窄幅上落，京東(09618)半日升0.4%，阿里(09988)半日升0.3%，但美團(03690)跟騰訊(00700)半日分別跌0.3%及0.6%。人民幣得到人行護航反彈，內房跟物管股唔再全面插水，只係呢兩個板塊本來就係弱底，內房股碧桂園(02007)跟龍湖(00960)分別跌2.7%及1.6%，國企內房潤地(01109)跟中國海外(00688)齊齊跌1.3%。
內需股今日表現較差，李寧(02331)半日跌2.8%，藍籌之中跑第尾；安踏(02020)半日亦跌1.5%，申洲國際(02313)亦跌1.1%。其他內需股藍籌股包括海底撈(06862)跟華潤啤酒(00291)半日分別跌1.9%及2.1%。
雖然有傳人行出手為人民幣護盤，但人民幣只係短線反彈，暫時未見有回升條件，所以人仔回升對港股帶嚟嘅支持亦難以持續，即使港股有反彈，或回補噚日所遺下嘅下跌裂口17900，要重返18000水平以上有難度，18000呢個心理關口，或已成為短線阻力，未能收復兼企穩，港股只有繼續尋底之旅。
麥狄文
(徐狄怡‧證監會持牌人)
