雖然隔晚美國公布CPI略低於預期，反映通脹壓力未有上升，但有聯儲局官員再放鷹，加上聯儲局議息紀錄預料美國經濟今年或溫和衰退，股神巴菲特仲要加把口，表示銀行風暴未過去，暫時唔會投資銀行股，令銀行股下跌，拖累美股高開低走。至於反映中國概念股嘅金龍指數更跌近4%，再加上金管局再承接90.51億元港元沽盤，港股今早顯著低開，一度跌逾400點後跌幅收窄，二萬大關失而復得。
恒指低開331點，甫開市已失守二萬大關，半日最多跌424點，見19885低位，但20天線(19880)力保不失，其後跌幅顯著收窄，更成功收復100天線(20072點)，跌幅一度收窄至37點，見20271半日高位，可惜此水平亦為10天線(20270點)所在，未能企穩，暫時10天線爭持。中午恒指收報20209，跌99點；國指跌42點，報6824；恒科指則跌46點，報4120。半日成交額618.46億元，跌市下成交較上日略為上升，但交投仍未見活躍，淡靜局面持續。
繼騰訊(00700)被南非大股東打晒開口牌，身體力行將近億股股份放入CCASS待沽後，又輪到阿里(09988)主要股東軟銀，表示已完成沽售10%阿里股份，更計劃將手上餘下一成股份繼續沽出套現。科網股表現較為疲弱。阿里之前表示將重組並分拆業務上市，令唔少人高追，博佢重拾紅底股身份再上，奈何股價見一見紅底又回落，家下軟銀又話會繼續沽貨，紅底不成睇佢仲守唔守得到90元。至於騰訊插水兩日後，今日反彈，半日倒升0.6%，暫時355元支持位仲守得到，多得公司繼續回購，但南非大股東仲有九千幾萬股要沽，要睇佢有幾大本事，公司回購能否敵得過主要股東沽貨套現。
至於上周表示亦計劃分拆嘅京東(09618)就相當唔爭氣，公布消息升咗半日已無影，股價半日再跌逾2%，暫時140元有個支持位，唔知頂得幾耐。相對阿里公布重組分拆後，股價都叫精神咗成個星期，京東呢頭公布分拆，嗰頭劉強東自己沽貨套現，食相難睇至極，擺明出個好消息嚟割韭菜，叫人對中概股仲點會有信心。
唔係話阿Man成日都睇死內房股，核心問題未解決，就係只有波幅，冇升幅，今日內房股雖未至打回原形，但都普遍下跌。融創(01918)停牌逾一年後，終於成功交返兩年業績出嚟申請復牌，復牌股價當然跳水，半日跌逾五成，如果要博反彈，阿Man無意見，但要伸手接飛刀，兼且去買一個本身已內傷嘅板塊，就似乎無乜值博率。
港股暫時叫守咗條20天線同100天線，但10天線危危乎，一旦10天線成為阻力，睇嚟再度考驗20天同100天線機會大，加上成交薄弱，即係二萬邊亦未見有資金肯入場，呢啲咁嘅情況，都係少做少錯，唔做唔錯。
麥狄文
(徐狄怡‧證監會持牌人)
