魚缸昨日發生兩件大事，一是輝達(Nvidia)業績後爆升，更撐起納指，其次是創科(00669)突然遭狙擊昨日急瀉一成九，今日復牌雖然曾彈8%，但未能企穩80蚊關，比前日計依然唔見一大截。
創科有先兆急跌
先講創科，喺咪盤數有輘輷，就真喺要搬前輩果句木宰羊，但呢間沽空機構明顯喺高手，尤其是下周三(3月1日)將公布業績，昨日急跌創科無得用回購還手，只能硬食捱打，而呢間沽空機構正正喺睇中呢個時機玩突襲。
表面筆者喺幫創科，但答案是錯錯錯，而家買入創科等同倒錢入海，創科大瀉市場喺錯重點，絶對不是因為呢份報告所致，重點喺美國樓市。
大家都知道創科與美樓市關係大，本周創科大客美國最大家居用品連鎖店家得寶便警告需求弱，當日創科股價已下挫，其實已為創科股價下挫揭開序幕。
再望埋美國30年期按揭利率，已由上月最低6.31厘升至目前6.94厘(圖一)，同時美國二手樓銷售2021年尾到目前銷量跳崖式下跌，情況如2005至2008年相似(圖二)，其實已為創科埋下急跌伏線，只是呢份報告催化創科跌得更快。
輝達預期PE超過50倍
至於輝達(Nvidia)表面看好似好過預期，但內裡其實相當差，截至1月29日止第四季每股經調整盈利為0.88美元，雖比市場預期的0.81美元佳，但按年卻是倒退33%，其內收入也是跌21%至60.51億美元。
昨晚輝達股價一度狂飆15%，原因是除了大行上調目標價外，更重要是輝達作為GPU一哥，隨著ChatGPT爆紅，行政總裁黃仁勳更點名ChatGPT是「AI界iPhone」，市場立即亢奮，GPU在ChatGPT熱潮下將會大賣。
不知大家會否覺得似曾相職，咪就喺「科技是未來」，亢奮下市場將估值拋諸腦後。按目前市場估計，雖然輝達未來一年每股盈利升32.7%，達至4.433美元，看似喺威喺勢，但仍未回到2022財年水平(4.44美元)。
若按此水平計，目前輝達預期市盈率超過50倍，更高過正一標準差(42.2倍)，閣下仲敢唔敢追入?
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周五在「信報網站」及「港股360」撰文。
