隔晚美股變動唔大，暫時仍然係納指跑輸，雖然美國10年債息已回落至3.43%，但科技股仍然較為弱勢，市場靜待下周聯儲局議息。美股變動唔大，但港股噚日高位急回，倒跌逾600點後，今早收復大部分失地，半日升逾500點，重返19000水平之上。
恒指高開高走，高開150點，見18965已經係半日低位，其後升幅逐步擴大，一度升591點，見19406半日高位。中午恒指收報19341，升526點，報19341；國指升204點，報6637；恒科指升219點，收4224。半日成交縮水至836.59億元，大市重返萬九水平，資金再次變得審慎，加上愈逼近聖誕節長假期，預計成交會愈趨淡靜。
港股半日再急升，係因為有消息指港府正檢討進一步放寛各項防疫措施嘅可能性，另外市場憧憬中港兩地通關在即，港股再度向好。藍籌股整體向好，友邦(01299)半日表現突出，反彈近4%，平保(02318)亦升3.6%，金融股只有大笨象(00005)半日逆市跌0.1%。港交所(00388)半日升3.8%，有消息指港交所就出售倫敦金屬交易所(LME)一事，拒絕了紐約證交所母公司洲際交易所(ICE)。汽車股繼續造好，吉利(00175)半日升3.1%，比亞迪(01211)升4.7%。
雖然美股嘅科技股疲弱，但港股呢邊科技股整體向好，無視隔晚反映中概股嘅金龍指數下跌，科技股今日高開高走，當中以阿里健康(00241)最強勁，半日升一成，係最大升幅藍籌股，ATMJ全面向上，美團(03690)跟阿里(09988)半日升6%，京東(09618)隨後升5.7%，騰訊(00700)則升近5%。其他科技股普遍升逾4%，嗶哩嗶哩(09626)半日升18.6%，資金開始由一線科技股，逐步流向二線科技股。通常短線見頂，都會出現呢個現象，希望唔好劣幣驅逐良幣，否則個市好難走得更遠。
市場憧憬內地優化防疫措施後，下一步係通關，首要跟澳門打通往來障礙，濠賭股今日集體抽升，除咗係憧憬內地通關外，有大行調高整個板塊估值及目標價。當中以永利(01128)升16.1%表現最強，新濠(00200)跟美高梅中國(02282)升逾一成，其他濠賭股普遍升逾半成。
內地優化防疫政策，官方已再無提動態清零，加上珠海、長沙不再查驗旅客核酸陰性證明及健康碼，帶動內地航空及機場股向上，國航(00753)跟南航(01055)半日升逾4%＿東航(00670)升2.8%，國泰(00293)雖蘊釀罷工潮，但股價半日亦升3.3%。首都機場(00694)及美蘭空港(00357)分別升2.2%及5.6%。
港股噚日急上急回，雖然今日反彈重返萬九關，但自10月低見14600水平回升，最高升至接近19800水平，累積升幅超過5000點，已從低位升逾三成，嚟到現水平，資金開始變得審慎，預期大市表現會較為反覆，萬九關亦非萬無一失。當然好友會力守此關，下一個較大支持位係10天線(18611點)，再下一支持係100天線(18327點)。睇返之前由14600起步，每次回調至20天線(18200點)大市必定回頭再向上，相信呢個會係好友嘅最後防線。留意成交能保持喺1200至1500億元，反映市場資金依然充裕，後市仍樂觀。
麥狄文
(徐狄怡‧證監會持牌人)
