喺通脹數據公布前夕，美股隔晚表現反覆，早段喺英國央行緊急救市行動周末前結束，一度帶動道指急彈逾400點，可惜中段跌勢復現，最終道指僅升36點；標指跟納指則分別跌23點及115點，晶片股沽壓嚴重，科網股偏軟。港股喺上周三勁彈千點後，連續四個交易日復跌，累計跌1255點打回原形，今早跌勢持續，半日再跌逾300點，恒科指則再創成立後新低，半日跌逾3%。
恒指低開74點，開市價16758已經係半日高位，其後跌幅擴大至384點，見16447半日低位，創自2011年10月以嚟超過11年低位。恒指半日跌336點，收報16495；國指跌121點，報5608；恒科指半日跌108點，收3170。半日成交額只有468.52億元，跌到蔗渣咁嘅估值，都未有資金肯入場接下貨，港股沒有最低，只有更低。
藍籌股又未至於全軍覆沒，友邦(01299)跟一孖內險股平保(02318)跟國壽(02628)逆市上升，連同宏橋(01378)跟石藥(01093)，成為五隻跌市中仍錄得升幅嘅股份。ATMJ全線下跌，騰訊(00700)半日跌2.4%；阿里(09988)跟美團(03690)半日跌逾4%；京東(09618)算係咁，半日跌1%左右，險守180水平。其他較受投資者關心嘅藍籌股，包括港交所(00388)、藥明生物(02269)跟比亞迪(01211)等等，全部下跌。
英倫銀行行長稱緊急救市行動周末前結束，英鎊又插水，拖累英國重資產股受壓，大笨象(00005)創52周低，半日跌2.8%；渣打(02888)同樣跌2.8%，保誠(02378)則跌2.6%。至於長和系嘅長和(00001)下跌0.8%，長建(01038)跌4.1%沽壓較大，而電能(00006)半日跌2.2%。
被稱為蘋果最強分析師郭明錤表示，蘋果最快三年美國市場產品去中國化，蘋概股捱沽。舜宇(02382)9月手機鏡頭出貨量按年跌28%，股價半日跌3.6%；瑞聲(02018)半日跌2.7%，高偉電子(01415)半日跌7.1%，相閞股份之中表現最差。
內地官媒《人民日報》連續第三日發文，堅持動態清零，內地餐飲股插水，內地堅持清零嘅政策，當然係為咗人民健康着想，但喺經濟角度呢，就當然有啲棘手啦，不過人命寶貴，阿爺嘅清零政策要堅持，咁就難免要有所犧牲。
麥狄文
(徐狄怡‧證監會持牌人)
