熱門:

2022年9月30日 港股直擊 即巿股評

【盤房來料】外圍未見底 港股陪跌有排捱

美股繼續尋底,即使美滙及長債息有所回落,美股仍然唔識彈,以目前標指嘅日線圖嚟睇,距離下降通道底部,至少仍有半成下跌空間;至於納指仲大鑊,距離下降道通底部仲有一成下跌空間。港股過去兩個交易日跌近700點,今早一早再跌逾百點,又再創11年新低,而恒科指破底,再創成立後新低。

恒指平開報17165,內地公布9月份官方製造業PMI重上擴張區間,數據好過預期,一度帶動港股回升178點,見17344半日高位。可惜其後公布嘅9月財新製造業PMI只有48.1,差過預期,大市掉頭回落,曾跌149點,見17016半日低位,亦係11年新低。不過萬七呢啲點都係大位,扮下嘢都要守一守,大市止跌回升,目前好淡拉鋸。恒指半日跌11點,報17154;國指半日跌18點,報5893;恒科指半日跌42點,報3439,盤中低見3021,為成立以嚟新低點。半日成交額只有429.39億元,既無北水入場,加上周末前夕兼下周二假期,邊有人願意入場。

藍籌個別發展,友邦(01299)重上65水平,半日反彈1.3%,大笨象(00005)亦隨英鎊反彈,半日升逾1%。內銀股今日彈得好啲,建行(00939)跟工行(01398)半日彈逾2%。有消息指內地放寛部份城市房貸條款,內房股彈返啲,碧桂園(02007)半日彈近一成,藍籌之中升最多,不過龍湖(00960)半日仍跌2.6%,唔係隻隻內房股有得彈,整個板塊積弱,醫返都嘥醫費。ATMJ全線下跌。

中概股又話解決咗審計底稿問題,其實美國佬無意放生中概股,美國證券交易委員會(SEC)警告,美國上市中國企業若更換審計公司,可能導致其最終未能符合持續掛牌條件。中概股噚晚喺美股已跌到一仆一碌,今日喺港股呢邊繼續走弱,當中又以中概汽車股跌勢較為顯著。汽車三傻插水,拖累比亞迪(01211)終失守200大關,半日插水3.6%,係表現最差藍籌股,穿埋200呢個大位,下個支持位要睇到落去180元。

港股真係無嘢好講,獨沽一味無乜點錯,就算萬七頂得住,一旦美股有乜冬瓜豆腐,都預咗再穿底,依家再講邊個係底都無乜意思。美股唔見底,港股都係繼續陰乾,欠缺成交支持,想嚟返次似樣啲嘅反彈都有心無力。即使港股跟隨外圍見底,仍要經歷長時間嘅收集,熊市步入熊三階段,就係漫長嘅收集期,即使有子彈坐貨,都要有心理準備係長時間作戰,至少都要坐返三五七個月,無咁嘅耐性,都係修心養性唔好手多多。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads