熱門:

2022年9月22日 港股直擊 即巿股評

【盤房來料】3月鐵底不堪一擊

FOMC隔晚一如預期加息0.75%,但會後聲明鮑爺再放鷹,除咗明年減息憧憬幻滅外,市場仲擔心聯儲局會持續大幅加息抗通脹,美股三大指數齊跌1.7%,反映中概股嘅金龍中國指數更錄得超過兩個月最大跌幅,跌至近四個月低位收市。港股喺美股疲軟下,早段一度跌逾400點,創十年九個月低位。

恒指低開363點,甫開市已失守今年3月15日低位18235,其後更跌至17965半日低位,最多跌479點,創自2011年12月19日以嚟新低,其後萬八大關失而復得,跌幅收窄見18195半日高位後,無力再反彈,目前險守萬八大關。半日恒指收18097,跌347點;國指半日報6168,跌98點;恒科指半日收3660,跌77點。半日成交額比噚日有所增加,有477.79億元,但顯然唔係見底回升,有資金抄底嘅格局。

七十幾隻藍籌股,僅五隻逆市上升,翰森製藥(03692)半日升3.6%,都算爆冷,因為同板塊嘅藥明生物(02269)仲未止跌,半日再跌2.2%。大笨象(00005)宣布調高最優惠利率,意味香港亦已進入加息周期,股價半日跌2.6%。友邦(01299)半日跌2.8%。至於科網四大天王ATMJ,當然難逃一跌,騰訊(00700)半日跌近1%,美團(03690)半日跌2.6%,京東(09618)半日跌3%,阿里(09988)跌得最多,半日跌3.4%;而百度(09888)半日亦跌2.8%。

中概股跌到一仆一碌,啲中概汽車股梗係無運行,雖然小鵬汽車(09868)旗下G9 SUV料成為最暢銷型號,但股價盤中創在港上市後新低,半日插水12.6%;蔚來(09866)緊隨其後,插8.1%;理想(02015)亦跌4.7%。比亞迪(0211)則仍守210水平,半日呹1.4%。傳統車股叫跌得少啲,但都要跌1.5%至2.3%不等。

本港進入加息周期,地產股受壓,整個板塊普遍要跌1%或以上。至於濠賭股彈完兩日,今日跟返大市回軟,澳博(00880)半日跌一成就礙眼啲,其他濠賭股都係回吐2.5%至3.5%左右。

睇返上次3月低位,有大量買盤湧入,同時亦逼使淡倉要急急平倉冚倉,其後大市反彈至22000水平。但今次當大市再次回落至19000水平樓下,再度逼近3月低位,都一直未見有資金入場,好明顯上次抄底嘅資金,已趁反彈至22000水平時順利離場套現,所以今次跌至該水平,已唔存在護盤需要,所謂嘅國家鐵底,變得不堪一擊。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads