熱門:

2022年9月16日 港股直擊 即巿股評

【盤房來料】港股萬九下仍乏人問津

美國已先後公布CPI跟PPI,兩個數據都反映通脹仍然高企,隔晚美股喺下周FOMC議息好淡爭持,不過今晚美國四重期結算,喺四巫日前,好友都無法反攻,隔晚美股三大指數下跌,似乎正向住下降通道底部出發。加上世銀警告全球經濟或陷入滯脹,隔晚美股再跌,港股無法延續噚日嘅反彈,今早再度受壓,一度挫逾兩百點,創六個月低位。

恒指低開197點,早段曾挫252點,低見18678,見六個月低位,但內地公布「三頭馬車」數據好過預期,大市跌幅收窄至25點,見半日18905,之後跌幅又再擴大。恒指半日跌80點,報18850;國指跌0.6%,報6470;恒科指半日跌48點,中午收3914。大市半日成交449.93億元,少得可憐,又係嗰句,沽壓嚟到呢啲位唔係大,但平咗咁多,萬九樓下都無乜人想買貨。

藍籌股個別發展,幾隻重磅科技股全部要跌,ATMJ跌幅都唔夠1%,係阿里(09988)跌1.1%。不過創科(00669)今日就逆市反彈近3%,暫時叫守得住90元。啤酒股有大行唱好,百威(01876)跟潤啤(00291)逆市靠穩,百威半日更升逾2%。大笨象(00005)半日升0.8%,但友邦(01299)則險守70元,但都要跟大市跌。藥明生物(02269)半日跌2.4%,反彈乏力。

市場關注今日賭牌開標情況,官方指賭牌開標大約傍晚有結果,大行預期現持有牌照嘅豪賭股應該可以順利續牌,濠賭股全線向上,當中以澳博(00880)半日升6.6%表現最突出,其他濠賭股亦錄得超過2%至5%升幅。

內地8月份進口煤炭轉為增加5%,進口炭增加令內地炭價難以再升,煤炭股普遍隨大市回落,其中神華(01088)跌4.7%,為表現最差藍籌股,整個板塊走軟,跌幅由1.1%至4.3%不等。

繼中金(03908)失驚無神供股後,國務院辦公廳發布鼓勵證券、基金、擔保等機構,進一步降低服務收費。生意已經無以前咁好,仲要減價益街坊,內地券商股明顯受壓,當中以廣發証券(01776)半日插7.1%最慘情,其他券商股閒閒地跌1%以上。

今晚美股四巫日,市場預計美股今晚都係由淡友主導,人仔見七算亦為A股帶嚟更大沽壓,港股暫時喺18800水平死撐,但喺周末前夕無人願入場,加上搵個利好消息都無,港股又係瓜多過菜。家陣個個都睇死港股要下試3月低位,若然再有稍為利淡消息,港股大有機會失守前底,短線18500係有個支持位,再落就18000-18200,早早講咗港股無運行,睇嚟靠邊站就係目前最佳策略。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads