美國公布咗一個遠超預期嘅CPI，市場開始擔心今個月議息要加夠一厘，美股應聲而下，三大指數跌勢顯著。美股咁插法，本來已弱底嘅港股點會有運行，半日跌近500點；恒科指半日更跌3%，4000大關失守。
恒指低開393點，之後跌幅曾略為收窄至337點，見18989半日高位，可惜連18900都上唔返，沽壓持續下，半日一度跌513點，見18813半日低位。恒指半日收18834，跌492點；國指跌165點，報6467；恒科指跌穿4000大關，跌3%，收3948。半日成交額521.14億元，話沽壓好嚴重咩，又唔算，但落咗19000都無資金入場撈平貨，一樣係濕滯。
藍籌股除咗中海油(00883)逆市升2.6%之外，其他全軍覆沒，大笨象(00005)跟友邦(01299)又同步，齊齊跌2.7%。內銀股跟內險股全線下跌，就連一向硬淨嘅中移動(00941)亦難逃一跌，半日挫1.8%。創科(00669)係成也家得寶(Home Depot)，敗也家得寶，隔晚家得寶喺股插水6.6%，拖累創科半日跌逾一成，係表現最差嘅藍籌股。
息率一向上，科技股就被拋售，隔晚喺美國反映中概股表現嘅金龍中國指數急跌3.3%，中概股插水，科技股今日明顯受壓。騰訊(00700)半日跌1.4%算跌得少；阿里(09988)跟京東(09618)半日分別跌4.4%及3.9%；美團(03690)半日跌2.5%。呢四隻科技股都係恒指成份股佔比較重嘅重磅股，佢哋跌到一仆一碌，恒指穿萬九上唔返去亦理所當然。其他科技股至少跌2%，其中嗶哩嗶哩(09626)被唔少大行調低目標價，股價噚日裂口低開後，今日再跌6%，成為表現最差恒科指成份股。
中金(03908)失驚無神AH齊齊玩供股，股價急跌近9%，佢咁搞一搞，拖累其他內地券商股齊齊下跌，跌幅至少1%，不過就係無中金半日急跌8.9%咁大鑊。睇返近日內地股市都係弱，喺人民幣滙價持續下跌之下，內地股市無得發圍，內地券商股都係死死吓。
美國就針對CRO股份又發行政指令，噚日呢個板塊瘋狂跳水，本已呈超賣，無奈今日大市仲要低走，想反彈亦動彈不得，藥明生物(02269)再跌逾3%，始終北美業務佔收入比例較高，反而同系藥明康德(02359)仲有得彈吓。其他CRO表現好壞參半，暫時都未跌定，唔好多手接飛刀。
麥狄文
(徐狄怡‧證監會持牌人)
