美國公布完CPI再公布PPI，兩個數字都顯示通脹有機會見頂回落，不過美股實在太超買，高開後回落，回吐壓力唔算大，暫時risk on情緒仍然高漲。至於港股今早表現反覆向好，上下波幅只有146點，半日成交額不足400億元，足以悶得死人。
恒指高開75點，20158係半日高位所在，但大市早段上升動力有限，一度倒跌71點，見20011半日低位，20000關守得住，大市掉頭再上。恒指半日升64點，報收20146；國指升32點，報6855；恒科指半日升22點，報收4349。半日成交額進一步縮水至392.56億元，乏善可陳，本來已係悶到嘔嘅港股，喺周末前夕更加無人願入場。
藍籌股有升有跌，友邦(01299)半日升0.9%；中移動(00941)派完成績表，中期純利升近兩成，派息亦唔錯，不過業績前已偷步炒上，半日只係升多1.6%，表現尚算平穩。ATMJ只有騰訊(00700)逆市下跌，雖然過去個幾星期都見北水買入，但去到300元樓上嘅騰訊，北水未必會再積極買貨，其他美團(03690)、京東(09618)跟阿里(09888)均見上升，但升幅都係一般，終終無成交配合，上升動力仍不足。
李寧(02331)公布上半年盈利增長11.6%，好過市場預期，主要係之前基數較低，股價半日升5.8%，藍籌之中表現最高，帶動其他體品股做好。不過內地經濟增長放緩，都唔好對呢個板塊抱太大期望，只係經過一輪調整之後，相關股份估值變得合理，加上憧憬疫情過後，銷售可復甦，對股價有一定支持。
內房跟物管股繼續死死下，龍湖(00960)噚日彈返少少，今日又回復跌勢，半日跌3.4%，藍籌之中表現最差，其他內房及物管股普遍向下，阿Man都預咗呢個板塊一段時間內都唔會有乜起色，始終內房債務問題困擾下，投資者對呢個板塊敬而遠之。
麥狄文
(徐狄怡‧證監會持牌人)
