隔晚美股繼續做好，雖然唔少公布咗業績嘅美企，業績表現麻麻，甚至調低下季或全年營收預測，但樂觀情緒高企，加上隔晚公布嘅服務業數據較預期理想，兼且有企業宣布大手回購，樂觀情緒進一步推高，三大指數造好，納指更升逾2%。港股今早跟隨美股造好，裂口高開，但A股高開低走，港股升幅亦隨之收窄。
恒指高開244點，其後升幅一度擴大至449點，見20216，但係A股高開低走，創業板更倒跌收市，令港股升幅亦收窄，始終受制10天線(約20320)，升幅縮至230點，見19997半日低位。半日恒指收報20054，升287點；國指收6838點，升101點；恒科指升93點，報4340。半日成交額只有508.3億元，交投又轉趨淡靜。
藍籌股普遍造好，阿里巴巴(09988)喺今日公布季績前，有報道指阿里主要股東日本軟銀將透過預付遠期合約（prepaid forward contracts），出售所持三份之一阿里股份，融資220億美元。軟銀呢個舉動，無疑令市場鬆咗一口氣，皆因軟銀咁大手貨，暫時搵到融資出路，唔需要喺市度直接沽貨，短期沽壓解除，對阿里股價係正面嘅。阿里半日升4%，不過軟銀手貨做咗融資，咁喺合約期內，銀行係有權動用手貨，咁呢銀行就應該會高沽低買，變相就有一個穩定價格嘅作用，即係嚟緊一段時間，阿里股價都傾向維持區間上落。
軟銀嘅舉動令阿里短期沽壓消除，阿里隔晚帶動咗唔少中概股上升，今日嘅科網股普遍造好，京東(09618)升4.5%；美團(03690)升2.7%；騰訊(00700)半日則升2.2%，只有網易(09999)逆市下跌，除咗因為8月份新批遊戲版號無份之外，公司更表示因財務糾紛，取消跟動視暴雪合作開發「魔獸世界」手遊，拖累股價半日下跌。至於其他重磅股如友邦(01299)、大笨象(00005)跟港交所(00388)均隨大市上升。至於比亞迪(01211)又到咗每月公布銷量嘅日子，上月銷量大升1.8倍，股價都例牌升一升，半日升1.8%，但暫時300元阻力衝唔破。
有消息指蘋果新一代iPhone 14喺面對手機銷情呆滯下，叫停加價，以增加客戶購買力，蘋概股有資金追捧。以高偉電子(01415)半日升近一成表現最好，其次係比亞迪電子(00285)升6.8%，舜宇(03282)半日升4.8%屈居季軍，其他蘋概股半日均見上升。
航運股今日逆市走軟，航運業一哥馬士基(Maersk)警告，今年全球貨櫃需求放緩。其實阿Man早早講咗，航運股嘅高位已見，就算上月中開始喺低位反彈，亦只有東方海外(00316)跟中遠海能(01138)能重返前高位，但兩者已形成雙頂形態，更確認航運股高位已見。
麥狄文
(徐狄怡‧證監會持牌人)
