美國眾議院議長佩洛西訪台，台海局勢緊張，市場態度審慎，隔晚美股回軟，一直過度樂觀的情緒略為減退。不過今早財新中國服務業PMI好過市場預期，曾令港股今早向好，半日升逾過百點，但恒指目前仍受制兩萬點大關。
恒指高開176點，財新服務業指數好過市場預期，推動大市最多曾升232點，見19921半日高位，但二萬點關始終未能收復，升幅更一度幾乎完全抹去，僅升1點，見19690半日低位。不過，中午收市前買盤重臨，令升幅再現，恒指半日收報19809，升120點；國指半日報6755，升53點；恒科指半日升94點，收4288。半日成交額又回落至546.83億元，反映市場態度審慎。
藍籌股個別發展，港交所(00388)跟友邦(01299)半日齊升0.2%，大笨象(00005)半日則跌近0.2%，但仍守50元之上。阿里巴巴(09988)跟騰訊(00700)半日反彈，分別升3.9%及2.6%，兩重磅科技股合共為大市貢獻87點升幅；京東(09618)半日升2.7%，美團(03690)半日升0.8%，四大重磅科技股為升市出力不少。至於表現最好嘅藍籌股係中芯(00981)，半日升8.6%；中升(00881)則成為表現最差藍籌股，半日跌7.4%。汽車股則唞一唞又嚟料，吉利(00175)半日升5.9%，比亞迪(01211)更一度重上290元之上。
不過，內房股跟物管股仍然疲弱，富力(02777)2018年發行的公司債大跌26%兼跌停，股價半日跌2.4%；其他內房股普遍下挫，就連具有央企背景嘅華潤置地(01109)半日亦跌2.7%，已經連續第六個交易日下跌。另一方面，市場擔心物管股要削肉救母，向內房母企授出貸款，物管股沽壓沉重，碧服(06098)再跌破年內低位。內房有事要內銀包底，內銀股表現亦疲弱，整個板塊走軟，但除工行(01398)跌1.2%外，其他內銀股跌幅均少於1%。
喺台海局勢緊張下，軍工股有資金追捧，中船防務H股(00317)半日升6.9%，中航科工(02357)抽升8%。不過阿Man就認為追貨唔多明智，雖然台海局勢係緊張，而內地亦表示將於未來幾日環台舉行軍演，但都只係炒作軍工股藉口，實際上唔見得軍工股真係受惠，資金快來快去，高追隨時又被套窂。
麥狄文
(徐狄怡‧證監會持牌人)
