隔晚美股略為回吐，但港股呢邊就因為一名美國女子打算去一轉台灣，而跌到一仆一碌，有消息指美國眾議院議長佩洛西(Nancy Pelosi)將今晚訪台，並會喺台灣逗留一晚過埋夜，台海局勢緊張，中港股市嚇到齊齊腳軟。恒指半日一度跌逾600點，上證指數半日亦跌近3%。
恒指低開222點，見19943已經係半日低位，低開低走兼沽壓沉重，半日一度跌幅擴大至650點，見19515低位，亦創兩個半月低位。中午跌幅略為收窄，中午恒指收報19619，跌545點；國指半日跌202點，報6674；恒生科指半日跌166點，收4157。半日成交額676.05億元，跌市成交唔算少，沽壓都頗為沉重。
藍籌股全軍覆沒，無一倖免，大笨象(00005)跌2.1%，雖然季績表現勝預期，又宣布可能恢復派季度息，但仍不敵大市跌勢，半日跌2.1%，仍守於50元水平之上。港交所(00388)半日跌近4%；友邦(01299)亦跌2.3%。至於噚日造好嘅汽車股，今日回吐，但相對噚日嘅升幅，吉利(00175)半日跌3.5%，比亞迪(01211)跌3.9%，表現已算硬淨。
科網股亦全線走軟，不過阿Man就吼緊位收集美團(03690)跟京東(09618)，前者170至175元收集，京東就試吓220至225元搵唔搵到位上車，兩股半日分別跌3%及4.2%。至於騰訊(00700)跌穿300仍然未搵到支持，雖然有「中國畢非德」之稱的段永平增持，公司亦偶有回購，但仍不敵南非股東嘅持續減持，加上跟網易(09999)暫未有遊戲獲納入8月版號，騰訊半日跌3.1%，網易亦跌3.5%。其他科網股閒閒地跌3%或以上，久遺嘅小米(01810)半日更跌6.1%，走勢持續疲弱。
物管股怕又見削肉救母之事，市場仍擔心物管股會向內房授出貸款，物管股沽壓未止，碧桂園服務(06098)為表現最差藍籌，半日再插8.3%，其他物管股閒閒地跌超過3%。內房股同樣走軟，睇嚟內房物管股仲有排捱。
暫時港股跟內地股市，受台海局勢緊張所影響，悲觀情緒主導下恒指失守20000大關，暫時只有繼續往下尋找支持，短線支持大約喺5月份低位，即係19200水平左右。雖然二萬樓下嘅港股，唔少股份已開始浮現吸引力，但市場傾向觀望台海局勢發展，睇嚟至少要等佩洛西訪台完畢，一切安然無恙，中港股市方有反彈機會。
麥狄文
(徐狄怡‧證監會持牌人)
