隔晚美股個別發展，市場觀望聯儲局議息，以及即將公布嘅GDP，道指跟標指回升，但SNAP績後股價急挫，科技股受壓，拖累納指獨跌。至於港股今早反覆向上，恒指高開113點，盤中升幅一度收窄至68點，見20631半日低位，其後A股倒升，港股重拾升勢，半日最多升335點，見20898。恒指半日升305點，收報20868；國指升105點，報7182；恒科指報4602，升68點。半日成交額略為回升至526.36億元，係就係略有增加，但以半日升逾300點計，呢個成交講唔上配合升勢。
藍籌股普遍上升，當中以阿里巴巴(09988)表現最標青，價量齊升，阿里宣布申請改變在香港的上市地位為主要上市，即日後喺香港同美國雙重第一上市。雖然唔少人推測，阿里係為咗日後就美國對中企審計問題，可能被退市而先鋪定路，但阿Man又唔係咁諗嘅，主要係返咗香港呢邊第一上市，就可以合符「港股通」資格，一旦納入，係有助令整體股東基礎更為多元化，加強喺港股嘅流動性。
阿里亦從來未有被美國嗰邊指佢嘅審計標準不達標，唔單止無被退市嘅風險，本身阿里亦未有打算喺紐交所自願退市，就算將第一上市轉到香港，仍可以維持紐交所嘅第二上市地位，繼續兩地上市。至於其他科網股，喺阿里消息令整體氣氛改善下，今日普遍上升。
阿爺講咗會高度重視爛尾樓問題，果然係有做嘢，噚日先有消息指，將成立高達3000億元人民幣嘅基金，以助停工項目繼續開工，希望能夠解決爛尾樓問題。今日再有內媒報道，浙江舟山即日起買樓有契稅補貼，單套補貼最高3萬元人民幣，同時中房協據報今日在杭州辦房產紓困商洽會，內房股進一步回勇。碧桂園(02007)半日升逾6%，成為最大升幅藍籌股。其他內房股跟物管股普遍向上，升幅由超過1%至接近一成不等。
不過，就算救爛尾樓嘅基金成立，暫時叫解決咗斷供潮問題，但呢條數究竟最終由邊個去埋單又成疑問。唔少內房已經連債息都還唔起，債冚債搞唔掂，先會出現停工問題，拖欠嘅債項就有拖無欠，依家又話整個3000億基金出嚟，講到底又係要內銀硬食。同時阿爺出手救咗呢批債務問題嚴重嘅內房，可能會衍生道德問題，經營不善嘅壞孩子，做錯事就有阿爺出面包底，咁日後仲有邊個願意循規蹈矩去做乖孩子呢！
呢一次阿爺都確係頭痛，救又怕助長歪風，唔救又怕引發金融系統危機。但為免斷供潮席捲全國，家下點都要救咗先，至於阿Man諗到嘅問題，就日後再作打算。
麥狄文
(徐狄怡‧證監會持牌人)
