美股隔晚繼續反彈，市場觀望聯儲局議息結果，以及關注加息及縮表步伐。港股連彈五日、恒指累升1232點後，今早回吐近300點，並以接近半日低位收市。恒指低開76點，其後跌幅一度收窄至54點，見21047半日高位，可惜二萬一關得而復失，大市持續受壓，半日最多跌288點，見20813半日低位。恒指半日收20820，跌281點；國指報7125，跌141點；恒科指報4272，跌137點。北水缺席下，半日成交額只有418億元，買賣兩閒。
藍籌股個別發展，內銀股建行(00939)跟工行(01398)逆市上升，分別升0.4%及0.2%。比亞迪(01211)4月新能源車銷量升3.1倍，股價早段曾高見242.2元，可惜升抵阻力位後未能繼續突破，半日升幅收窄至0.5%。不過，保險股則走弱，友邦(01299)跟平保(02318)分別跌1.4%及1.8%。港股成交買少見少，就算再有IPO籌備緊，又或者近日新股上市，都未能帶動大市氣氛，港交所(00388)半日跌1.5%。
重磅科技股表現較弱，美團(03690)雖然近日強勢，喺北水休假前得北水密密掃貨，但紅杉資本沈南鵬一再減持，美團股價半日跌近6%，唔排除呢一輪反彈已結束，今日更成為表現最差藍籌股。京東健康(06618)亦遭大股東劉強東減持，股價半日跌11.6%，成為表現最差恒科指成份股。至於京東(09618)跟阿里巴巴(09988)，半日齊跌逾4%。嗶哩嗶哩(09626)被高盛指業務能見度低，狠削其目標價至231元，股價半日跌6.7%。龍頭騰訊(00700)半日跌3.3%；散戶至愛短炒嘅快手(01024)，半日亦跌3.9%。科技股之前強勢不再，睇嚟又係時候唞唞。
唔單止科技股走弱，生物科技股亦見沽壓，噚日再跌逾一成嘅和黃醫藥(00013)，今日未能止瀉，再跌至20元邊。其他生科股閒閒地跌4%或以上，就連信達生物(01801)呢啲甩咗B，有望賺錢嘅公司，半日亦再跌7.5%，再創三年新低。龍頭藥明生物(02269)半日亦跌4.4%，又回落至10天線尋找支持。
雖然大笨象(00005)公布季績時未有加碼回購，但已計劃將本來嘅回購金額，喺8月底前回購多10億美元股份，半日升近2%，只係50元水平未知能否企穩。其他本地銀行股喺聯儲局議息前普遍上升。本地地產股亦普遍向上，近日多個新盤開賣，抑壓咗一段時間嘅購買力，令新盤開賣成績理想，只係喺加息環境下，阿Man對地產股後市睇法比較保守。
麥狄文
(徐狄怡‧證監會持牌人)
