喺作戰室嘅戰友上個星期五(3月11日)都已經知道，小妹住嗰幢大廈被政府話污水樣本呈陽性，已經喺每戶嘅信箱放入三包快測套裝比大家自己諗掂佢。星期六(12日)我同我家老爺又趁假日一早落樓做採購，買完嘢返上樓兩兜友就顫顫驚驚咁做快測，好彩，我哋兩個都無事，算是鬆一口氣，但都唔等於可以鬆懈，因為仲有我家肥貓要照顧。都希望大家好好保重身體，保護自己同屋企人。
噚晚惠東4.1級地震，有香港市民報話都感受到震動，我家肥貓一覺瞓天光，我諗佢Feel唔到啦；不過恒指Feel到，完U後指數低開349點，報20203點開市，不過今日見恒指牛熊證街貨圖上，最貼價牛證為20000至20099點，呢度有相當於1164張期指。換言之，指數要殺街貨的話就必需要向下再落返去20000點至20099點呢度，所以未正式開市前都喺作戰室講定要出淡倉；到正式開市之後，首五分鐘指數加快向下插落嘅速度，呢啲位追係辛苦，但為咗穿20000點爬到格仔，點都要撐住。去到9點40分，指數已經向下穿20000點，最低暫時(@0946)做過19984點，呢啲齊點數大位一穿，隨時又嚟多浸長城，所以到依家9點49分，指數跌幅收窄都真係合理不過，格仔爬完當然好走，因為隨時11點又可以再嚟過。
睇返牛熊街貨圖，呢一Round冧市計，以上個星期五收市見呢個街貨圖，算係第二次牛熊兩邊差距拉返窄，本來當牛熊街貨距離收窄之後，再比多少少新生出嚟嗰幾層全返咁上下街貨，咁個市就有機會逆轉，但今次又同第一次一樣，當兩邊街貨開始拉近時，指數又係二話不說的向住牛證方向殺落去，合理嘅，跌市容易升市難，跌市真係唔需要資金撐起，話沽就沽，而向下殺落去嘅力度同點數都係大，今次仲要穿埋20000點。
嚟到接近10點，小時圖上見指數出咗下影線踩住保歷加通道底線，同時呢條底線又見有向下情況，Slow STC(14,3)兩線勢頭向下，仲有一個鐘林鄭就出嚟啦，恒指熊(57605)，收回價20448點，同現價有約425點差距，約34倍槓桿夠做DT，吼五分鐘圖見指數受制於50分鐘線(五分鐘圖10線)就偷位出動啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
