噚日恒指牛(68048)出嚟，仲時喺上半場度即開即食，猶如罐裝紅燒牛肉一樣，方便又好味。不過，指數呢幾日都係靠近熊證街貨層，又大市氣氛呢期都唔太差，再向上殺都真係唔奇，結果今日恒指開市上破24000點，開市升330點。到正式開市之後，喺首五分鐘內指數再向上高衝至24100點以上水平，首三層熊證就係咁嘅環境之下被全數收回，呢度有相當於1252張期指，呢個早餐仲飽過All day breakfast。
指數同Slow STC(14,3)都上到咁高，本以為指數高開後會低走，所以喺聊天室裡面都計劃定出淡倉，以博指數向下回落，但條件當然要Slow STC(14,3)配合啦。可惜等到9點45分，指數再向下行不得止，反而再向上係咁做出今日高位，24100至24199點隨時今日都凍過水。
出淡倉唔得咪試下反手囉，敬畏市場，順勢而行嘛。其實，噚日都有講過，喺日線圖上見指數噚日都爭少少上到保歷加通道頂線，如果上破就上望50天線。噚日高位係有穿過保歷加通道頂線一下，今日就一下子上破埋50天線，依家見仲企喺條線上面，不過Slow STC(14,3)%K線開始入到嚴重超買範圍，同步見兩線只有作勢喺高位出現橫行，未有遇頂回落嘅情況。
嚟到9點58分，擼貓貓一陣之後(永遠摸完佢都要咬我一下，有時好輕力，有時有啲肉緊，不過無損傷嘅，但唔知做點解)，喺恒指五分鐘圖上見到指數喺高位開始出現橫行，動作似乎等50分鐘線(五分鐘圖10線)上嚟接住恒指兼做踩板再比指數再上咁款。
明白到呢啲位如果要再出隻好倉的話，五分鐘圖上嘅Slow STC(14,3)咁高，都真係只能夠硬住頭皮去落場。咁樣，見指數喺五分鐘圖上踩得住50天線有力再去的話，先至再出隻恒指牛(69532)，收回價23493點，為市場上最貼價牛證截當中，槓桿最高，雖然係市場上最貼價牛咋喎，但都同現價有逾600點差距。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
