隔晚美股反彈，雖然市場仍憂慮變種病毒，但美國總統拜登決定暫時唔會採取封城鎮國政策，美股就有得反彈，標指跟納指反彈幅度超過1%。不過港股就弱過藥煲，今日唔單止彈唔起，更跌破年內低位，創14個月新低。恒指低開69點，早段曾倒升36點，見23888點半日高位，其後沽壓再現，半日最多跌348點，見23503點半日低位，創去年9月30日以來新低。恒指中午收報23591點，跌260點；國企指數報8405點，跌92點；恒科指報6036點，跌63點。
藍籌大致受壓，騰訊(00700)跌1.6%，美團(03690)績後未止跌，再跌3.3%，阿里(09988)創本港上市新低，半日跌2.7%，穿埋130元，沒有最低，只有更低。單係ATM三件重磅科網股合共拖低恒指144點。港股愈玩愈縮，港交所(00388)半日跌3.1%，本來呢隻一直係阿Man愛股，但港股咁嘅款，短期港交所都難有運行，暫時擺埋一邊唔使睇。至於半日跌最多嘅係華潤置地(01109)，跌逾4%；信義光能(00968)則逆市升3.2%，係表現最好嘅藍籌股。
內地修例電子煙參照捲煙規定執行，近日炒高的電子煙及煙草概念股，今早集體回吐。其中思摩爾(06969)阿man就食正佢今次嘅升浪，半日跌咗6.7%，但見45元有支持，剛好條10天線守住。其他非龍頭嘅跌幅更大，好似華寶(00336)同比亞迪電子(00285)呢啲，半日跌逾8%唔多識彈，所以揀股都係揀返龍頭穩陣。
工信部加快工業芯片軟件等融合支撐產業發展，相關股份逆市升。當中以華虹(01347)半日升8.6%最強勁，中芯(00981)始終上面太多蟹貨，半日僅升1.2%。華虹有報告睇59元，但急升追貨勝算低，都係眼看手勿動。
反而呢啲時候，阿Man寧願睇返騰訊跟京東(09618)，兩股已逼近支持位，前者450元有支持，後者330元，要博用幾蚊止蝕博反彈十幾廿蚊，計咗數，有數圍，當大市反彈，自然都係呢啲龍頭彈最多。
麥狄文
(徐狄怡‧證監會持牌人)
