大廈一早貼出通告話今日全幢樓都會大停電，原因係好似話做啲檢查之類，停到連Lift都無得搭，唯有噚晚執定包伏，今日一早起身放定一大碗糧加零食比我家肥貓後就出門口，坐五個幾巴士「遠征」去我老媽家，用佢嘅電、用佢嘅wifi、飲佢嘅水(哈哈)，今晚仲有同我家老爺兩個一齊食佢嘅飯，不過老媽你屋企個wifi唔係好穩定，收市後幫你睇睇咩料。
依家9點48分，恒指今朝開市升14點之後指數便隨保歷加通道口拓闊而向下走，Slow STC(14,3)兩線都處於超賣水平，到依家連50分鐘線(五分鐘圖10線)都仲未上得返去，
至於噚日隻恒指熊(52784)，大家都見到指數喺噚日下晝蓬一聲無厘頭咁抽咗上去，去到下晝2點鐘打後又蓬一聲落返嚟，捉到呢個swing trade嚟做嘅話就真係爽皮。而(52784)亦都可以吼Slow STC(14,3)上到超買時出場，只係噚日Slow STC(14,3)超買嘅時間比較耐，由下半場開始至2點5分都係80以上水平，當呢段時間出隻(52784)的話，以當時高低位0.086元/0.062元計，平均買入價為0.074元。再睇返噚日指數由落，以噚日下晝3點35分至全日收市止，Slow STC(14,3)都處於超賣水平，如果喺呢段時間沽走隻(52784)的話，以當時高低位曾經做過0.083元/0.073元，平均沽貨價為0.078元，即日平均賺幅為5.41%。但如果你過埋夜嘅話，以依家10點1分計，恒指繼續往向下沉，而見(52784)證價都有0.09元以上，呢注熊過夜的話，今日應該可以唔駛做。
嚟到10點4分，指數跌幅終於見到有少少收窄，不過，從小時圖見指數喺噚日隊高上到保歷加通道中軸之後回落，至依家指數繼續向下但仲未掂到保歷加通道底線，即係話指數如果要再向下行的話係有空間架啦。
恒指熊(52956)，收回價25028點，同現價有約400點差距，做DT的話槓桿都夠，有成42倍。安全嘅吼返五分鐘圖指數Slow STC(14,3)上到超買時先至進場，進取嘅就吼五分鐘如指數過唔到100分鐘線(五分鐘圖20線)就衝入去啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
