噚日其實收到一個好消息，就係一位比較識得耐嘅讀者Walter升級做爸爸啦！恭喜晒！Day 1 BB，歡迎你嚟到呢個世界，enjoy your world！
噚日揀咗隻恒科牛(59544)出嚟，計劃係大包圍今個星期所有嘅科網股業續，並打算喺五分鐘圖上見指數同Slow STC(14,3)下行嘅時候小注出動。呢個位都算等得耐，喺噚日下半場3點20分見恒科指Slow STC(14,3)終於落到超賣，仲再行出嚴重超賣至到3點45分先見%K線上返%D線，喺呢個時候出隻(59544)的話，按當時高低位0.074元/0.072元計，平均買入價為0.073元。不過呢個位入市都預咗過夜，雖然講明小注，但同時都要考慮埋過夜嘅因素。
今朝我家肥貓非常活躍，仲好大膽咁跳上嚟我做嘢嘅地方，同佢玩咗一陣之後就完U，恒指今朝開市報25446點，升55點；而恒科指今朝開市報6612點，升11點，隻(59544)暫時安全；而喺聊天室上有同大家講可以試住出好倉爬格仔先，畢竟如果今日高開低走的話，咁都可以爬到格仔，反正恒指現價都企近熊證街貨。但可惜喺正式開市後，恒科指似乎有啲腳軟，至依家9點37分，指數微跌3點；而(59544)仲咬緊0.075元，暫時就由得佢先啦。
嚟到依家9點57分，恒指無啦啦一下子爆上25500點以上水平，喺五分鐘圖上「大陽燭」清晰可見，雖然中段有喺聊天室同大家講如見高開低走嘅走勢就出淡倉啦，不過開市到依家都未見過，唔知有幾多戰友手中仍持好倉啦。
如果有聽開收音機嘅朋友，可能已經發現咗我喺某個台裡面嘅一個節目當中一小截嘅環節時段出現，而噚日喺呢個小環節裡面就提到友邦(01299)，事關見佢日線圖Slow STC(14,3)低位回升，兼且噚日都收返條10天線返嚟，如果上得到20天線的話，又大膽啲可以睇埋條50天線。
依家10點7分，見友邦喺五分鐘圖嘅走勢暫時呈高開低走，啱啦，等到Slow STC(14,3)落返去超賣區時，先至出隻友邦牛(61193)，收回價80元，同一收回水平中槓桿最高，有約12.62倍。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
即市聊天室/Patreon：https://www.patreon.com/cbbcwar
FB：https://www.facebook.com/cbbcwar
