噚日喺舊同事「傍住」底下完成人生第一個電台嘅電話錄音，即使以前讀新聞系主修電台及電視台，但畢業到依家根本都無做過相關嘅工作，反而做咗文字嘅工作。「咁當初你又揀電台及電視台嗰邊嚟修？」因為當年教授建議我既然文字嗰邊我本身已經搞得掂，不如修另外一邊，由唔太熟悉嘅變成熟悉，咁畢業之後嘅發展有好多嘛！佢都真係為我好架，呢位教授間唔中都會聯絡，只不過喺我臨畢業時，被我當年嘅系主任派咗去一間報館度做，其後一直喺文字界工作，直至依家叫做開始試下接觸熟悉的陌生範疇。
依家9點34分，恒指做完U盤開市報26234點，升102點，呢口開市價恒指已經企返上熊證街貨第一層，雖然指數暫時呈高開低走，不過，今朝喺聊天室點咗兩隻個股都做得唔錯，第一隻當然係有九萬幾個利好消息硬推上300元樓上嘅比亞迪(01211)啦，真係本以為比亞迪會回一回氣先至再闖300元關口，唔駛啦，Tesla隔晚股價上破1000美元、今朝有消息話聯交所已經確認比亞迪分拆比亞迪半導體出嚟，今朝比亞迪股價已經進一步推高至逾320元樓上開市。第二 隻就係聽日(10月27日)公布季績嘅港交所(00388)，呢隻都係噚日錄音時提到嘅股份。依家9點53分，港交所股價升1.1%，報489.4元；至於恒指升完又跌，跌完又升，係咁轉燈，似乎都係轉向玩正股好過。
就繼續港交所啦！今朝完U盤時已經先港交所Slow STC(14,3)於超賣水平見回升，所以先至未正式開市之前喺聊天室上揀定Call同牛(係呀，無揀到淡倉架)，依家見五分鐘圖股價已經上咗去，唯一可以做嘅就係等返股價回落返去天線水平，例如100分鐘線(五分鐘圖20線)，睇睇有無支持先至再出返好追再博季績；安全嘅當然可以用返Slow STC(14,3)做Swing Trade，即等返Slow STC(14,3)落返去超賣水平時先至出手好倉。
港交牛(54805)，收回價450元，同現價有約7.75%差距，槓桿約11.61倍夠Day Trade玩嘅。依家10點14分，五分鐘圖見股價似於保歷加通道中軸有支持啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
FB：https://www.facebook.com/cbbcwar
