為咗個「獅子山」，搞到天文台要出嚟解畫，唔係話幫天文台，我相信天文台都真係根據氣象同科學去決定點掛啲風球同出暴雨警告，只不過係可以「人性化」少少啫。
依家9點43分，恒指都完U開咗市，今朝跌逾300點，開低於25000點以下，最衰噚日就係爭嗰廿幾點先掂到條50天線，仲未符合開恒指Put(24356)，如果唔係今日開市就肥啦。然而，喺五分鐘圖上見指數大裂口向下同時，Slow STC(14,3)都同步向下，不過，暫時指數有呈低開高走嘅跡象。至於小時圖方面，由於噚日裂口高位嗰一個位係未補，再加上今日裂口低開呢個位都暫時未補，技術上目前小時圖係出現咗「孤島頂」嘅情況，只係今日低開之後指數回落到保歷加通道中軸附近，如果指數喺小時圖上喺保歷加通道中軸上覓得支持再彈起的話，就要留意返會唔會補到今日個裂口。
嚟到10點11分，指數咬返上25000點不得止，似乎仲愈上愈有，喺小時圖上見指數雖然仍然低於10小時線(小時圖10線)，不過就有上行嘅情況，始終一日未補得到今日個低開裂口，一日小時圖上噚日嗰堆燭都仲係「孤島頂」。
都係望埋恒指牛熊證街貨圖先，今日牛熊兩邊都無新增街貨，熊證最貼價仍然係25400至25499點，不過呢度走咁啲又死咁啲，得返相當於70張期指街貨，再上多100點嘅話，即25500至25599點就有相當於703張期指，兩邊近貨計佢都算係最重嘅一層。至於牛證方面，最近嘅街貨層為24200至24299點，呢度有相當於120張期指，再落多層嘅話都有522張期指。而以依家10點29分恒指做緊25145點，恒指目前仍然靠近上方熊證。
「咁出牛向上再殺熊證街貨咪得囉！」問題嚟啦，依家10點52分見指數於五分鐘圖上，今朝低開高走上至保歷加通道中軸後，至今仍然未能上破該水平；上得到更係出好倉追上啦，如果唔得啦喎，恒指Put(24356)，同噚日揀嗰隻係一樣嘅，行使價25000點，低引伸，槓桿適中。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
