點都估唔到噚日真係烏鴉口中,朝早仲話指數如果要踩入熊證重貨區(噚日喺24700至27499點)嘅話,咁個市要升成700點先可上到,結果就真係上比你睇,只係成交剛好過千億鬆啲,所以噚日除咗朝早個裂口之外,全日都係以慢升嘅方法呈上,呢種文火煮熊真係煮死人,唔覺唔覺忽然向上爆幾點十,回返十零點再橫行,又再忽然爆上幾點十,如是者幾次之後,就上咗成百點,再嚟多Round,24700點輕鬆上到,即使噚日完U盤之升幅有啲收窄,但恒指都仲咬得住喺24700點以上收市。
噚晚瞓得唔多好,主要係擔心做長廳嘅我家肥貓會被會三號風球同黃雨嚇親,「佢流浪過架嘛,無事嘅」雖然係啫,但都唔等於唔驚架,上次落雹嚇Q死我哋兩個添呀!早咗起身就早啲準備開市前工作,反正今日都係唔會掛到八號;要迎接北水放完假返嚟嘛。
依家9點2分,恒指開緊U盤,日經已經由今朝早8點幾時升逾300幾點,至依家已經升逾570點;到恒指行完U盤,開市報25064點,升363點,首三層熊證街貨全死,呢度有相當於892張期指;如果將25000至25099點呢度拆細至以50點為一層的話,咁25000至25049點嘅熊證都已經全部陣亡,呢度有相當於811張期指,即係話恒指一完U盤就有1703張期指街貨全部被收回。
恒指一支箭咁飆咗上去,由五分鐘圖型時圖都見到Slow STC(14,3)已經喺超買緊,以Swing Trade做法的確係出淡倉嘅時機;只不過指數目前又處於熊證街貨層,而目前最貼價嘅牛證,收回價仍然係24300點,換言之指數要由現價(9點42分的24861點)回返落去,要下行逾500點先至可以做到。
街貨 VS 技術分析再次出現,但往往喺呢個時侯街貨都係會贏技術分析。雨愈落愈大,天愈嚟愈暗,還記得聊天室有戰友曾經講過落雨天市總會跌,今日到底係個市贏,定係個天贏呢?
嚟到9點48分,大家都等緊一個出好倉嘅機會,博指數取易捨難再向上跳,呢個機會最快嘅應該係見五分鐘圖上恒指回落100分鐘線(五分鐘圖20線)而見有支持彈上嘅一刻;安全嘅當然可以耐心等待Slow STC(14,3)回返落去超賣先至出手,因為依家Slow STC(14,3)只係回到落去中軸水平。
恒指牛(55308),收回價24000點,同現價有逾700點差距,約35倍槓桿是在同一收回水平的牛證中最高及最活躍。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
聊天室/Patreon:https://www.patreon.com/cbbcwar
Facebook:https://www.facebook.com/cbbcwar