今個星期得四個交易日，星期五(10月1日)紅日又可以連放三日，準備好去邊度玩未呀？過埋呢個星期，就會進入今年第四季，回顧一下今年首三季暫時成績都總算不過不失，未見有倍升賺幅，打過兩次靶，一貫密食當三翻策略，繼續努力！
依家9點31分，我家肥貓比平時早咗攤喺度準備瞓覺，恒指今朝完U盤，開報跌60點之後，到正式開市就反方向發力抽升，留意日線圖上見指數走勢形態仲係沿住10天線水平向下，Slow STC(14,3)兩線則仍處於超賣水平。
再睇埋牛熊證街貨圖，見到兩邊都有新增街貨層，牛證最貼價上移至24000至24099點，呢度有相當於123張期指；至於熊證最貼價為24600至24699點，呢度有相當於70張期指。計計中間位為(24099+24600)/2=24349.5點。以目前(9點38分)恒指報24334點計，恒指叫做仍然近牛證街貨層，但說實話，話佢企喺中間都不為過。
喺五分鐘圖上見恒指今朝一大支陽燭由跌轉升，不過期後見到恒指行咗粒「射擊之星」嘅物體出嚟，基本上見到佢暗示有高位回落嘅情況；再加上恒指現價近牛證街貨，但就嫌Slow STC(14,3)現水平未夠高，亦未見回落。去到9點47分，個天又開始暗，肥貓瞓到呼嚕呼嚕咁(原來貓咪真係有鼻鼾，哈哈)，恒指升幅又開始見到收窄，不過連保歷加通道口都見有收窄情況，不過見指數又似踩得住保歷加通道中軸再上咁，嗯...都係放埋恒指一二邊先。
又試下向個股掏寶，今早收到輪商好友Gary send來嘅message，劈頭第一句就係：小米見本年低位...，老實講開佢所有圖都見Slow STC(14,3)兩線雖然處於超賣，甚至係嚴重超賣水平，不過「超賣再超賣」嘅個情況持續，但喺10點左右，見到佢五分鐘圖出「錘頭」之後再嚟多支「大陽燭」，唔心動就呃你嘅，但冷靜過後，都係等佢有本事彈埋上50分鐘線(五分鐘圖10線)先至再講啦，捉轉角位你估真係咁易咩。
睇返上個星期五喺【下半Part】bookmark咗嘅滙控(00005)，今日股價見隨大市上行，截至依家10點7分止，最高見過41.1元，日線圖上上破20天線(40.55元)，只不過搶得高得滯，所以喺五分鐘圖見高位徘徊中，Slow STC(14,3)兩線勢頭向下，50分鐘線則好努力咁爬緊上去搵個股。
搵定隻滙豐牛(62813)，收回價38元，同現價有逾6.8%差距，(62813)為相同收回價中最高槓桿(約11.33倍)及最低街貨(2.34%)嘅一隻，依家10點14分，股價剛剛跌穿50分鐘線，唯有耐心啲等佢Slow STC(14,3)落返去超賣位時先至入手，事關我喺10分鐘圖上見到一個幾完整嘅「黃昏之星」，中間嗰粒燭仲要係「射擊之星」添。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
