熱門:

2021年9月16日 港股直擊 即巿股評

【輪證贏家】恒指熊總站見

噚日偷位入咗隻恒指熊(53436),初初仲擔心小時圖Slow STC(14,3)會出觸底回升做快閃黨,之後見下半場開市恒指見明顯跌幅先叫做安心啲,兼大膽啲睇25000至25099點嗰層街貨,誰不知噚日一個唔該最低見過24990點,出淡倉目標已經達到,然後喺噚日嘅【輪證下半Part】就再無留低任何目標,所以,以喺恒指跌穿25000點時,,即大約噚日下晝2點15分至2點30分,(53436)高低位做過0.118元/0.011元計,平均買入價為0.114元,好在(53436)本身槓桿唔曳,加上噚日恒指下跌得夠多,呢注34.9%賺幅夠找晒噚日送上嚟嘅10袋貓砂有凸。

如果你仍然揸住隻(53436)或其他淡倉,唔緊要,依家9點17分,恒指仲做緊U盤,以噚晚ADR計,恒指有機會喺25000點喘定;同個舊同事whatsapp完見到已經9點32分,恒指本身開市微升8點,不過已經見到依家倒跌79點,報24953點。揸咗淡倉過夜嘅,怕且本身都可以以25000點呢個目標為第一站,第二站應該係日線圖上嘅保歷加通道底線(約24790點),一旦再到站嘅話,隨時總站以8月20日低位24581點,亦即依家見恒指牛熊證街貨圖上24500至24599點嘅重貨區做目標,呢層重貨都有相當於1510張期指,市愈跌,牛愈肥;牛用肥,市更跌。根本就係一個loop,直至到熊證街貨追返現價為止。

舊老細Whatsapp我問股票,今次問REITs,好嘢呀!呢啲阿婆嘢都唔係真係人人識欣賞,用REITs做避彈衣真係唔錯。同佢傾完之後再睇返恒指,依家10點6分,日級圖上見連上文講過嘅第二個目標,即日級圖嘅保歷加通道底線都無埋,恒指跌258點,做緊24774點,換言之牛證街貨又死多層,最貼價依家落到去24700至24799點,呢度有相當於353張期指,再落嘅24600至24677點開始嚟料,有逾600張期指,亦係最多新增街貨層,會唔會今日又一步到位,殺到落總站24500點?會都唔奇,事關上方熊證最貼價層只係去到25700至25799點,都同現價有接近1000點差距,唔向下落指數食乜?

恒指熊(56466),收回價25687點,市場上最貼價熊證裡面槓桿最高嘅一隻,亦即係話聽日返嚟會見到熊證最多都係新增一層25600至25699點嘅街貨。不過,要留意指數計埋今日已連跌四日,累跌(截至10點12分報24725點計)1480點,即使追落都唔好追得太得意忘形,始終日線圖Slow STC(14,3)兩線已經進入嚴重超賣至超賣範圍,仍然以恒指五分鐘圖見指數上破唔到50分鐘線(五分鐘圖10線)偷位落場。

希望總站見。

作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

Patreon:https://www.patreon.com/cbbcwar
Facebook:https://www.facebook.com/cbbcwar

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads