噚日揀咗隻恒指牛(52023)出嚟，諗住吼恒指五分鐘圖出完「雙頂」回落到頸線之後見支持就小注偷位出動，最終位喺偷到，大約喺噚日下晝2點25分至2點35分，見指數處於頸線水平+Slow STC(14,3)到超賣+指數處於保歷加通道底，呢個位入真係心諗呢鋪掂啦，按(52023)當時高低位做過0.072元/0.068元，平均買入價為0.07元。
好景當然係不常啦(如果答我喺旺角嘅話，你已經暴露年齡啦，哈哈！)，千算萬算就係諗漏咗一樣嘢，就係條死人保歷加通道點都唔拓闊，但係就得條Slow STC(14,3)向上炒返上去。等到下晝3點15分，見Slow STC(14,3)都係炒到上60幾70頭時就無力，諗住仲有45分鐘時間，對付呢啲市況，其實同對住我家隻初嚟步到嘅貓咪一樣，都係比多少少耐性啦，最後去到3點35分至3點45分，Slow STC(14,3)再次上返去60幾至70頭呢個位，望望(52023)當時證價高低位做過0.071元/0.069元，平均價又係0.07元，白做(仲要蝕埋手續費)！
今朝起身同我家老爺花咗半個鐘去清理貓咪噚晚離開佢間紙屋，落地喺廳度行嘅所有證據(主要係貓毛)之後，就到我哋兩老開工。執咗一輪稿之後，恒指終於開市，升53點；到搭正9點半之後個市就「BOOM」一聲向下殺逾200幾點，頭嗰10分鐘真係見到個市咁chok真係頭到暈，唯有同聊天室戰友講定如果恒指五分鐘圖見指數向下再插穿所有天線的話，快手出淡倉追埋嗰少少Slow STC(14,3)向下到超賣到嚴重超賣位，心態以爬格仔mode為主。
依家10點，電話忽然著咗，收到Push原來係「央媒指青少年網絡沉迷現象普遍，騰訊(00700)旗下王者榮耀被點名」哦...怪不得隻企鵝晨咁早就跌近一成啦。
換個小時圖見指數喺10點出今日第二粒燭時已處於保歷加下降通道，只可以通道口無見拓闊，底線大約喺25684點，Slow STC(14,3)兩線勢頭當然向下啦。恒指熊(51999)，收回價26400點，同現價有約440點差距，係比平時揀嘅有大約500零點差距進取咗，事關由現價(10點34分@25815點)計，同小時圖保歷加通道底線有131點，隨時兩步路就到；望就更係望個保歷加通道口會拓闊啦！吼恒指五分鐘圖彈返上50小時線/100小時線時先小注出手。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
