噚日用恒指牛熊做咗一趟Swing Trade，最後一次出手就係將隻恒指牛(51783)沽走，同時當時都見到恒指五分鐘圖上Slow STC(14,3)於超買水平高位回落中，再以swing trade出淡倉追返恒指落去的確係可以，只係當時已經3點幾，再轉多次隨時要喺臨收市前10分鐘，甚至係5分鐘趕住出貨。
又咁講，呢注追淡係真係得嘅，更正嘅係喺噚日臨收市前大約8分鐘見到Slow STC(14,3)喺超賣水平低位回升中，喺聊天室都有同戰友講返聲吼呢啲位小注出Call，博第二日Slow STC(14,3)出技術反彈都可以，不過，最後完埋U盤見唔駛等第二日開市先嚟彈，完咗個U盤之後已經見到恒指被夾高咗。
結果，今朝恒指開市升178點，報27694點，未到9點半已經同聊天室戰友講定開市先走隻過夜好倉，之後嘅事又之後再算。
依家9點44分，恒指開市後稍為回一回再一口氣衝咗上27750點附近，升幅一度擴大逾200點，期後又稍為回落。先唔理個五分鐘圖走勢，望返個恒指日線圖，其實指數出咗八連跌之後真係重傷，一度失守250天牛熊分界線，其後踩穩再上亦屬合理，不過，再畫返之前畫咗成個星期嘅大型「楔形」出嚟，就見到大型「楔形」嘅底線同10天線(28006點)差唔多，用日線圖trade返條指數向上的話，短線可以28000點做住目標先。
依家10點正，恒指今日似乎好升得咁，聊天室隻過夜好倉早放咗，激氣！不過唔緊要，賺少咗好過倒輸，永遠心態決定境界。到依家見指數升幅進一步擴大至升389點，報27904點，換言之今日新增嘅27800至27899點嘅熊證街貨全數死亡，呢度只有36張期指，唔算多嘅；同時最貼價層變相為27900至27999點呢度就有305張期指啦，話多唔多(對比下方牛證嘅街貨數量)，但話少又唔算少(對比其他熊證街貨層嘅街貨數量)，一旦今日指數挑戰28000點的話，即係大市有機會升逾400點，隨時連27900至27999點嘅熊證都死埋。
不過，睇返恒指五分鐘圖，呢100點暫時都比較難博，雖然保歷加通道口已經拓闊，係咁比位指數上，不過喺五分鐘圖至小時圖裡面，條條Slow STC(14,3)都行緊超買至嚴重超買，等Slow STC(14,3)高位回落出淡倉係可以，但似乎都只能夠用爬格仔嘅方式，換個角度不如等下指數稍為回落之後，出隻恒指牛(64027)，收回價27150點，同現價有逾700點差距，安全槓桿又偏高，例牌等Slow STC(14,3)回落到超賣水平先出手，進取嘅見指數踩得到保歷加通道中軸的話就去啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
Facebook：https://www.facebook.com/cbbcwar
秒投聊天室：https://bit.ly/31HG6AN
