噚日6月第一個交易日開局總算唔錯,至少噚日都有唔少可以逼到位入好倉;不過都估到噚日恒指無啦啦咁升法,今日都應該儲咗唔少近熊街貨喺樓上,伴隨五分鐘圖,甚至小時圖SlowSTC(14,3)上到嚴重超買嘅走勢圖,技術分析 VS 街貨,呢個問題真係老是常出現;但說實話,10次有8次都係街貨勝,原因好簡單,發行商揸住啲期指無用,要沽到貨賺到中間份對沖先至有飯開;當一地都係街貨,一地都無人放,啲貨點先可以快啲甩到手?最唔用腦嘅方法就係啪Q咗佢,當然,人出雞你出鼓油,鼓油都要比錢買嘅。
依家10點6分,今日天氣好似唔錯,希望今晚唔好落雨,事關今晚約咗舊老細Ivan(人稱焚爺)同埋師兄老樓劉兆昌飯局,兩位猛男搵我陪飯,哼!聚下啫,你諗多咗啦!
恒指今朝開市跌5X點,不消兩個回合落到保歷加通道底部;好快又踩住條底線再彈到上頂,又再回過,開局半個鐘頭內出現咗咁樣嘅市況,原因只有一個:保歷加通道實在太窄。
睇到依家10點19分,恒指都仲喺得嗰幾廿點上上落落,轉去個股搵食,見搵返呢期升到巴巴聲啲ATMX先啦,咦?隻隻日線圖條SlowSTC(14,3)都上到超買範圍,唔通係比個提示我,等你碌返落嚟開淡倉?反正隻隻SlowSTC(14,3)目前都未見有轉勢訊號,就等住先囉,以佢哋依家呢個日線圖再追好倉又怕無肉食,反手出淡倉又未見有訊號,目前只可以做嘅就係bookmark定。
反過嚟睇恒指,五分鐘圖上仍然見到指數喺窄窄嘅保歷加通道上落,換遠啲用到小時圖,就見SlowSTC(14,3)兩線處於90以上嚴重超買水平,而%K線剛好跌穿%D線,唔用腦的話真係好想博隻恒指淡倉出博;猶疑緊之際,再望清楚個五分鐘圖,畫畫下畫到個疑似「雙底」嘅物體...
咁多顧忌,恒指又磨咗成個鐘,都係睇定啲先啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon:https://www.patreon.com/cbbcwar
秒投輪證教室:https://bit.ly/31HG6AN