呢兩日港股真係悶到爆，好彩噚日有隻小米(01810)撞到有啲嘢睇下；望望月曆，今日美團(03690)業績，但好似早兩日先high完嘢咁...算啦，我都係睇返恒指算啦。
今朝起身睇新聞，電視右下角loop住日經，升成400幾點，今日又係期結日，再望望牛熊證街貨圖，見到以噚日恒指收市價計，仍然向住量多熊證街貨出發，心諗今日恒指怕且都會係向上衝埋殺熊證街貨為主。
至依家9點57分，恒指高開後都有見過回落，但問題係今日高開幅度唔多，得百零點，喺五分鐘圖上所見指數同平均線嘅距離都唔係好遠，所以都有喺聊天室度話「隨時抽高」，結果，不消兩個回合又抽返上去，不過，見到條SlowSTC(14,3)兩線都上到80至90嘅超買範圍，怕且呢啲時侯都係等轉勢訊號出現，然後再出淡倉爬格仔。
話口未完，喺10點4分已見恒指五分鐘圖出高位回落，SlowSTC(14,3)已經超買水平向下中；八掛睇埋30分鐘圖同小時圖，的確未見轉勢，好正常；再睇埋日線圖，見到今日SlowSTC(14,3)兩線上到90以上嚴重超買水平兼有作勢高位橫行準備回落，而走勢圖上亦見指數頂住咗條保歷加通道頂部(29333點)。
「再來淡倉？」可以，DT嚟講五分鐘圖見恒指回落出淡倉(聊天室一早講定)爬格仔的話，留意指數回落至50分鐘線(五分鐘圖 x 10線)見支持的話，隨時反手，畢竟目前保歷加通道口仍然拓闊，即使SlowSTC(14,3)上到超買水平，唯隨時有條件比佢再出超買再超買。咁大原因做唔到反手，理由只有一個，就係指數的確踩住熊證街貨層。
睇返今日都有唔少新恒牛上市，收回價最貼迫至28900至28999點，同現價有逾300點差距；企遠啲永遠都係安全啲，恒指牛(65970)，收回價28750點，同現價有近550點差距，逾51倍槓桿用嚟爬格仔嘅話應該都執到餐茶嘅；再安全啲嘅就當然係等五分鐘圖SlowSTC(14,3)回落到超賣水平時先進場啦，反正今日星期五又就嚟完5月，持盈保泰下個月再重新開局再計數又何樂而不為呢？
貪心鬼唔想乾等嘅話，恒指熊(57317)，收回價29800點，同現價有逾500點差距，一過50分鐘線或100分鐘線(五分鐘圖 x 20線)出手，留意SlowSTC(14,3)走勢。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
