今朝仲喺張床時聲到出到有啲滴水聲，拉開少少窗簾原來落緊雨，心諗：麻煩啦！由地鐵站行去新場，路路暢通的話都要10分鐘；刷完個牙再睇，已經雨過天晴，天文台話有驟雨，都真係好驟下。
依家9點44分，恒指開市升逾200點後走勢保持向上，其實都唔難估到，如果有睇開牛熊證街貨圖再按佢一貫正常路向你就會推測得到：以噚日恒指收市價咁近上方熊證街貨層+恒指五分鐘圖條SlowSTC(14,3)低位回升。快手出注好倉當然無問題，問題在於小時圖上都見到SlowSTC(14,3)上到超買位置，只能夠話小心行事。(都唔high得過上個星期二(5月11日)hold到依家隻恒指Put(22380)，周線圖又未宣布死亡，指數仍處於保歷加下降通道，不過望望日線圖見指數今日裂口升穿10天線，但又有條20天線好似做到阻力喎，不過出「雙底」樣喎，如果佢破咗條頸線咪PK？天使&魔鬼，你兩個行埋一邊嘈住先)
過多10分鐘到，暫時見恒指咬住285XX點附近，最高暫時做過28617點，喺牛熊證街貨圖上見到熊證首三層街貨全數死亡，最貼價層上移至28600至28699點，呢三層夾埋有相當於1253張期指。望望月曆聽日紅日，好快下個星期又返嚟準備期結，暫時睇上去今個5月都唔係好窮啫；不過你最好窮，窮到褲穿窿添啦。
嚟到10點1分，見指數都仲係未有異樣，開始向個股出發，搵搵下路過隻思摩爾(06969)，小時圖上面粒「射擊之星」再加埋SlowSTC(14,3)高位向下，張圖靚到呢...可惜無Put/熊證，觀賞用。
搵到去港交所(00388)，日線圖見上星期二開始踩住150天線，SlowSTC(14,3)出超賣再超賣成個星期，今日終於見%K線抬頭升穿%D線，可恨暫時有條50天線做咗阻力。換個五分鐘圖去睇，就見股價隨大市高開後回落，至依家10點17分，見股價失守50分鐘線(五分鐘圖 x 10線)，不過又嫌SlowSTC(14,3)勢頭唔係好向下，都係觀賞用。
又過咗一陣，終於搵到隻心裡面會「嘩！」一聲嘅個股，就係安踏(02020)，已經無興趣搵新聞睇下佢發生咩事，只係見到佢五分鐘圖高開後出疑似「射擊之星」，跟住10連陰(裁至10點28分止)向下殺落去，久違了嘅SlowSTC(14,3)兩線連1嘅數值都無，呢個圖真係精彩。老老實實，10分鐘圖都見安踏條SlowSTC(14,3)係未正式出現轉勢，要捉反手都要啲時間。
安踏牛(57636)，收回價$130，離現價約8%，槓桿比率約9.12倍，為市場上第二高槓桿牛證，唔求佢出個「V」型反彈彈返上去今朝開市水平，偷得到位彈得返上50分鐘線爬格仔就算啦；留意10分鐘圖會唔會都出到轉勢訊號，有出到先至小注落場，畢竟都係比較冷門資產，吼唔到位嘅話，觀賞用囉。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
