母親節你哋點過呀？同屋企人去飲餐茶？我就無乜特別，呢兩日我家老爺全程常伴我左右，因為老媽要返工(開心嘅日日都係母親節啦，唔開心嘅就會變成「武親節」)
今朝早喺地鐵見指數做完U盤，開升160幾點；喺新場樓下再次路經嗰條充滿Graffiti嘅後巷，開app見到指數回一回，但就睥到恒指五分鐘圖回到落保歷加通道中軸似有企穩，所以都係聊天室度同大家講聲：企得穩的話就出好倉，上到位就見指數真係踩住條保歷加通道中軸再去，可惜有戰友話太快追唔到，唯有等下一個機會。
依家9點54分，reload一下個恒指五分鐘圖之後已經見到作勢高位想問落，但SlowSTC(14,3)就未見有明顯，所以暫時都係一動不如一靜。望望隔離個股，美團一開市大大支陰燭向下殺咗落去，留名等睇穿$270。
心思思八掛下隻勝訊(00700)，當日上$800、$900，甚至$1000歡呼聲咁高(9點59分戰友話美團$270穿埋，真快手)，見恒指高開低走，騰訊走勢應該都差唔多，依家見佢五分鐘圖都穿埋保歷加通道中軸，怕且都要啲時間先至可以沉到落到保歷加通道底部，反而小時圖同日線圖都見到騰訊條SlowSTC(14,3)出緊超賣，小時圖好啲，見到%K線剛好低位抽升上%D線，但日線圖仲有見到有，真心小時圖SlowSTC(14,3)個低位回升真係好靚，只係問題在於整條保歷加通道向下方向走緊，小時圖上，上星期五(5月7日)支燭嘅低位($600)，同今朝第一支燭嘅低位($599)只爭$1做成「平底」，同時今朝陰陽燭形態上出咗「倒轉錘頭」。
其實恒指/騰訊兜返上去都真係「合理」，事關見到今日牛熊證街貨圖上，熊證第一層28900至28999點有相當於850張期指，已經係熊證嘅重貨區。依家10點13分，恒指五分鐘圖見指數又再踩住保歷加通道中軸再去，點數做緊28738點，升127點，同熊證第一層街貨爭160幾點，要敲門有幾難？只係騰訊配合一下就得啦。
騰訊牛(63739)，收回價$576.49，離現價逾4%，見到佢樓上有兩隻牛證條街貨都高於50%，罷明有人儲緊啦，(63739)勝在低街貨，免得中咗之後出現人踩人情況。一如以往，按五分鐘圖見騰訊回到落超賣位時小注出場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
