真係要再次多謝表姐噚日贈我嗰四隻櫻花蝦溏心蛋，連我家咀刁老爺都讚好，同事亦託我向表姐跪求recipe(已到手，有趣興的都可以PM我，表姐表示多謝大家欣賞)，做法唔算好難，只係要準備嘅嘢同時間比較多，心機菜。
今朝喺屋企見到出面隧道塞到傻，以為都係一般返塞車啫，誰不知同事兼街坊阿Jo whatsapp報料話原來又炒車，佢Darling用咗接近一個鐘嘅時間先出到隧道，呢段路平時15分鐘就行到；變陣早少少出門口坐地鐵返工，返到嚟同平時嘅時間差唔多，thank you Jo。
喺地鐵上恒指做完U盤，開得都唔算好差，升95點，開市報28716點，不過都係plan唔到開市策略，事關本身恒指五分鐘圖上SlowSTC(14,3)都已經向超賣方向發展，呢個點數報出嚟少少高開低走幾乎成為梗局，如是者不如索性等恒指回到落底位之後，再睇到時保歷加通道同SlowSTC(14,3)嘅走勢，再決定點做好過。
返到嚟開晒電腦斟好杯水，再還返個膠盒比表姐之後，睇返恒指五分鐘圖高開後受制於500分鐘線(五分鐘圖 X 100線)，伴隨一支大陰燭向下插之後，指數開始踩到保歷加通道底部附近，同時見SlowSTC(14,3)都落到超賣水平，由於保歷加通道口未見拓闊，於是估計恒指會做到swing trade，所以都喺聊天室同大家講準備出好倉。
還記得早兩日喺【輪證贏家】隻稿度bookmark咗隻京東(09618)，今朝喺地鐵時手多望下，U盤都做得唔錯喎，再睇日線圖，Woo！Bravo！SlowSTC(14,3)落嚴重超賣我一早知，噚日恒指大幅下挫，京東二仔底無得唔跟，日線圖上以「錘頭」嘅形態跌出保歷加通道以外範圍，今日再隨大市上行重返保歷加通道內，暫時陰陽燭圖見呈接近「十字星」，10天線仍然係阻力，但SlowSTC(14,3)%K線有低位升穿%D線嘅跡象。
京東Call(21302)，行使價$339.08，同現價有逾16%價外，9月23日到期，槓桿同引伸都屬於適中，成交活躍低街貨係佢賣點，博京東日線反彈的話，吼佢五分鐘圖SlowSTC(14,3)落返去超賣區先至進場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
