今朝落街排隊等巴士時個天想落雨咁款，等緊車時開app望望啲報價，見到噚日揀中但又心大心細嘅中石油(00857)逆市造好，開市後到依家10點23分都keep到條氣向上爬，噚日揀咗嘅中油Call(23690)依家見到都有6.3%升幅，再見返小時圖中石油上到保歷加通道頂以外範圍，通道口都有keep住拓闊，而SlowSTC(14,3)keep住做緊超買再超買，我個心比個天更黑。
依家10點28分，恒指今早低開28點之後跌幅隨五分分鐘圖保歷加通道口拓闊而擴大，至依力SlowSTC(14,3)落到嚴重超賣水平，但由於保歷加通道口未有橫行或收窄嘅情況，所以SlowSTC(14,3)即使超賣，都仲有機會出超賣再超賣。
遠少少再睇埋小時圖，今朝早出咗第一支陰燭後，依家再出多支陰燭，位置比第一支低，而且貼近保歷加通道中軸，SlowSTC(14,3)雖然由噚日80超買位掉頭下行至依家60至70呢個位，出淡倉係可以，不過就要小心保歷加通道中軸會否忽然成為支持，無啦啦將指數推返上去。
「明明噚日恒指收市嗰個位好近熊證街貨，又明明熊證街貨多於牛證街貨，點解大市都會選擇反方向行嘅？」傻瓜，我知嘅話就工都唔駛返啦！又或者只能夠講現階段恒指仲未有「理由」或「藉口」將個市推上去，仲要推埋上50天線呢個由3月19日至今嘅阻力水平。
再睇清楚恒指日線圖，見今日10天線同20天線咁啱都係處於286XX點呢個位，以目前10點38分恒指最低做過28655點計，真係踩住呢條線咬到實一實，乃念SlowSTC(14,3)兩線仍然勢頭向上，如以日線圖trade出淡倉有少少進取，姑且望住呢條10天線同20天線，一旦下跌，恒指熊(51597)，收回價29300點，同現價有近600點差距，約30倍槓桿Day trade又得，trade多十都得，成交活躍低街貨都係揀佢嘅原因之一。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
