可能呢期比較多嘢做，噚日打隻【下半Part】之後，一如以往地將佢放上Patreon，再放上FB/MeWe同IG，隔咗一陣收到個message，唉，原來隻稿放錯咗FB page，仲要係被膊頭有花嘅發現，當下嗰刻我幾想搵窿瓹呀...多謝你放我一馬。
噚日朝早就揀咗隻騰訊(00700)Call(23037)出嚟，目的就係吼住聽日(3月24日)業績。本身喺朝早見到騰訊五分鐘圖SlowSTC(14,3)落到接近超賣水平，但數值上%D線只係低於30後就再彈返上去，坦白講都唔係一個靚位入場，最後等到下半場3點10分至3點30分，騰訊五分鐘圖SlowSTC(14,3)落到嚴重超賣水平，呢個時候(23037)可以小注進場，當時(23037)證價報$0.227。
及至今朝，騰訊股價隨恒指高開，截至依家10點10分止，恒指已由升轉跌報28810點，跌75點，而騰訊則能逆市撐起，報$638，升0.7%。反正(23037)係用嚟部署聽日業績，當然，如果今日下半場騰訊發威嘅話，(23037)唔駛等放榜都食得食，只係留意住走勢就可以。
至於【下半Part】再揀嘅小米(01810)Put(21761)，由於喺下半場小米五分鐘圖SlowSTC(14,3)一直沉降，搵個位接隻(21761)都無。截至依家10點19分，媽呀！小米股價唔止沉降咁簡單，根本就係鯨落，唉...
睇返日線圖，噚日敲中小米都幾係因為日線圖上見不過100天線，同埋SlowSTC(14,3)作勢高位回落。今日睇SlowSTC(14,3)已確認下行，100天線亦都過唔到嘅同時，50天線($27.841)喺上面成粒彗星碩落中，作勢插穿100天線出「死亡交叉」；再睇清楚原來噚日出埋「十字星」，雖然未至於係一個好高位嘅「十字星」，但都發揮咗佢轉勢嘅「功能」。
返番去睇小米五分鐘圖，見SlowSTC(14,3)已經出左超賣再超賣，唉，唯有等五分鐘圖股價跌定後兼有返少少力時，如反彈撞上50分鐘線(五分鐘圖 X 10線)或100分鐘線(五分鐘圖 X 20線)後見無力再上時先至再出手都唔遲，噚日隻(21761)今日見100%街貨(駛唔駛咁呀！留返啲比我都唔得嘅！)轉小米Put(20516)，行使價$24.23，同現價約有6.3%價外，5月頭到期...嗯...玩幾日OK嘅，低引伸、高槓桿，最緊要低街貨呀！係低街貨呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
