話說呢期個人處於不安狀態(不誇張，有一晚幾近崩潰)，但慶幸身邊有成打樹窿常伴我左右，經過一日嘅調整之後，不安狀態大幅減少，餘下嘅就真係靠自己；只係想喺呢度同咁多個樹窿講聲：多謝晒！
講返個市。噚日對條恒指真係零感覺，但見到恒生科技指數日線圖上出現疑似「十字星」+高開低走嘅陽燭+SlowSTC(14,3)%K線低位升穿%D線，於是膽粗粗喺恒科指五分鐘圖見SlowSTC(14,3)落到超賣水平時入市，結果喺噚日下晝1點10分至3點15分，幾乎成個下半場SlowSTC(14,3)都處於20以下嘅嚴重超賣水平，唯幸指數唔係大幅下瀉，入牛都唔係話太驚，以呢段時間(58168)高低位做過$0.073/$0.064計，平均買入價為$0.0685。
噚日喺【輪證下半Part】都有講過(58168)入咗嘅話好大機會係變成過夜注，所以買入嘅話都應該喺注碼上作出風險管理。其實去到噚日臨收市前半個鐘，都已經見到恒科指五分鐘圖SlowSTC(14,3)都由超賣水平上行，至今朝恒指雖然開市僅升2點，但到依家10點23分，恒指升幅擴大至逾升400點，而恒科指由今朝開市升16點至依家升290點，喺五分鐘圖上SlowSTC(14,3)早已出超買再超買，基本上由開市至依家(10點24分)(58168)都已經可以沽走，按呢段時(58168)高低位做過$0.096/$0.071，平均沽貨價為$0.0835。過夜晚平均執到21.9%，成績都算不錯。
「咁可唔可以繼續Keep隻(58168)呀？」Whatever係(58168)定係其他恒科指嘅好倉都好，如前文所指，其實噚日都係睇恒科指日線圖而出隻牛證，今日以截到10點35分計，日線圖上有150天線支持住但頭頂100天線仲擋路，而10天線都Keep住向下作勢想跌穿100天線出「死亡交叉」，見好即收唔好咩？
最後，多謝Oscar(同事阿Jo男友)又幫我抽Hello Kitty朱古力蛋，喂！無重複架！咁好運記得買定聽晚開嘅六合彩呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
