呢啲陰陰濕濕嘅天氣真係好瞓，今日差啲瞓過龍，好彩都仲趕得到平時搭開嗰架巴士返工，喺車程上繼續聽我嘅Mirror同Error。
今朝早喺屋企食緊嘢時睇新聞都見到日線跌緊400至500點，恒指開波就更係跟跌，今朝早開市大裂口跌逾500點，到正式開市之後再向下仆多幾百點，殺到落28513點先識停。今朝都有同聊天室戰友講，估28900至28999點，同埋28800至28899點嘅熊仔街貨今日隨時會死，只係估唔到一殺就殺到落到28500點附近，牛熊證街貨圖上首六層已全數收回，至於28500至28599點，雖然未死得晒，但都索性用28400至28499點當係熊證街貨首層。
依家10點7分，恒指跌幅稍為收窄，至跌535點，做緊28701點，喺五分鐘圖上見恒指低開後回升，但連最近嘅50分鐘線(五分鐘圖 X 10線)都未掂到就回返落去；聊天室戰友問：珊姐今日係咪無咁悶？其實都真係未必，開市無耐恒指就殺咗接近七層嘅街貨，阿市真係隨時可以收工，唔駛理我哋。
恒指上落飄忽比較難捉，當然可以向佢影子埋手。恒指服務公司之前出咗改革諮詢結果，但就未正式執行，所以恒指仍然都可以係「騰指」，換言之，所謂嘅影子，就係騰訊(00700)。
較早前已經喺聊天室捉定騰訊出嚟，喺大約10點12分騰訊五分鐘圖上約$670呢個位位支持，同步SlowSTC(14,3)都見回升，依家10點27分，騰訊上過50分鐘線之上，雖然有啲腳軟，但念在小時圖見SlowSTC(14,3)兩隻處於嚴重超賣水平%K線(7.143)低位升穿%D線(6.839)，始有利好訊號。
承如前文所指，今日市係偏向淡嘅，要喺偏淡嘅市場上出好倉並唔係一件易事，都係同一個玩法，喺五分鐘圖上等騰訊SlowSTC(14,3)碌返落去超賣水平時，小注出騰訊牛(68401)，收回價$635，15.82倍槓桿Day trade都夠。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
