噚晚收工遇到件「奇事」。話說行到落接近地鐵站時，有位小姐同一個婆婆用住一對求助嘅眼神去scan落去地鐵站嘅每一位，而我被scan中，婆婆搶先開口：彩霞邨點去？一問之下原來婆婆先問嗰位小姐「彩霞邨點去？」，但小姐自問睇地圖零分，本身佢示意我指個方向比佢知，佢帶婆婆去就可以；當然，行兩步路我又唔會死嘅，於是三個人，婆婆左青龍、右白虎咁，靠住Google map點住佢要去嘅彩霞邨，行到接近淘大商場附近時，可能商場夠光，婆婆話佢已經認得條路。
我到依家先知原來淘大有個位搭升降機上彩霞邨；亦多謝噚晚排喺我哋三個前面嗰位男士，男士接咗我哋力，帶婆婆返邨。被人問路變帶路我都唔係第一次；但同另一位大家都係唔識嘅一齊帶路，就真係第一次，anyway，小姐話婆婆好彩遇到我，咁不如話好彩婆婆遇到你，有你陪佢喺條樓梯度scan，又點會scan中我？
噚日揀咗藥明(02269)出嚟，亦都喺噚日搵到兩個靚位(即五分鐘圖SlowSTC(14,3)處於超賣位)落場，分別係朝早11點5分至11點25分，同埋1點40分至1點55分。按藥明Call(12444)喺呢兩個時段高低位分別做過$0.238/$0.226，同$0.235/$0.23，平均買入價分別為$0.232同$0.2325。
噚日下半場真係被恒指悶到 咗線，而喺噚日下晝大約2點40分至2點55分，喺藥明五分鐘圖上見SlowSTC(14,3)上到90以上嘅超買範圍，雖然噚日揀藥明係因為貪佢日線圖價殘，但五分鐘圖有餬食當然可以食咗先講啦。按呢段時間(12444)高低位做過$0.25/$0.247計，平均沽貨價為$0.2485，對比噚日兩個平均買入價，平均賺幅介乎5.7%至8%。
如持貨過夜，並堅持以日線圖做trade的話，今日見藥明股價隨市高開後低走，留意今日SlowSTC(14,3)兩線仍處於超賣水平但同告向上，只係目前日線圖遇上50天線($106.91)阻力，上方10天線($107.96)向下，作勢發出「死亡交叉」訊號。留意日線圖走位，萬一50天線成阻力的話，今日隨時見SlowSTC(14,3)上番超買位置，甚至(12444)計過數，收夠籌後收工亦唔問題。
依家10點11分，恒指重返今朝開市水平，喺聊天室上都有同大家講喺五分鐘圖上框到恒指踩住50分鐘線(五分鐘圖 X 10線)出「早晨之星」，我唔知佢哋有幾多人見到而出左恒指牛，反正呢期個聊天室又係虧虧地；至於(12444)，見藥明五分鐘圖SlowSTC(14,3)出現V彈，雖然股價未返到去今朝開市時個價位，但SlowSTC(14,3)又係上到50至60呢個位作勢回落咁，都係呢個時間收起隻(12444)先，以10點15分計(12444)做緊$0.27，平均賺幅為14.9%至17.4%，袋咗落袋先係錢嘛。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
