做人嘅嘢公道啲，事關今年開始【輪證贏家】同【輪證下半Part】每月都有個月結報告出嚟被大家鞭屍，噚日港交牛(63945)嗰一注，就當喺噚日朝早見港交所(00388)五分鐘圖SlowSTC(14,3)落到超賣水平時入貨，其實由朝早10點15分至上半場完結時，SlowSTC(14,3)都係keep住嚴重超賣，就算喺11點5分至11點10分，港交所股價企圖或意圖上保歷加通道中軸水平，但不果後再落，SlowSTC(14,3)仍然都係keep住嚴重超賣，去到11點23分低見$514，以(63945)收回價為$515，即時打靶，而(63945)行使價$513，都唔駛等發行商計，港交所噚日收市價$509，低於(63945)嘅行使價，100%全數虧損。
港交所慘不忍睹，主要都係因波叔話要加印花稅；同事噚日話：加牌費就係要舒緩交通擠塞；咁加印花稅係咪要減少經濟活動？我接：係舒緩落盤時嘅擠塞，以免server暴斃。真係唔該晒。
噚日恒指屍橫遍野，波叔就話咁啱撞正港股有調整啫，同加印花稅係無關係嘅；是但啦，你話點就點啦，最多我哋班day trade做少一兩轉啫。
經過一日冷靜後，今日返嚟見恒指衝高逾400點開市都無再失心瘋，至依家10點11分見至喺聊天室度話見恒指五分鐘圖50分鐘線(5分鐘圖 X 10線)有支持而出一小注恒指牛，皆因同步都要留意恒指小時圖被10小時線(1小時 X 10線)同100小時線(1小時 X 100線)夾住，慢慢重拾心情同市場脈搏，然後再嚟過；反正今日都只係博恒指日線圖上20天線(29741點)有支持，過唔過得返10天線(30404點)之後再算。
至於今日將會公布業績嘅銀娛(00027)，截至依家10點15分止，股價逆市下行跌0.9%，做緊$74.2。五分鐘圖上見銀娛股價今早隨市一早彈起，回落過後再上，但之後就唔似恒指可以上返去接近今朝早嘅開市水平，而係向保歷加通道底出發，SlowSTC(14,3)亦於50中軸位置已見明顯下行，追佢業績想出好倉嘅要留意五分鐘圖上保歷加通道底守唔守得住個股價，同步SlowSTC(14,3)撞返起上去，一旦發現轉勢，銀娛Call(19469)，行使價75.05，屬輕微價外Call，引伸偏低，槓桿適中。
依家10點27分，恒指做返今朝開市個升勢，聊天室開咗恒指牛嘅都已經收工。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
