噚日揀咗隻恒指牛(63080)出嚟，朝早第一注出時有啲雞手鴨腳，事關個位有啲窄之於又唔係好多水位，呢一注打個和執身彩。
第二注就係喺下晝大約2點半到，見恒指蠢蠢欲動，不過安全計(63080)都應該等確認上破50分鐘線先再出手，否則又要走多次難。誰不知電視直播住行政長官同一班官員打「香港第一針」，或者係有疫苗、或者係官員打針嘅關係，恒指都為佢打打氣，由2點半Live開始升到2點50分個Live做完，最後仲見倒升。
就係呢段時間裡面，喺2點25分至2點30分見恒指五分鐘圖上破50分鐘線(5分鐘圖 X 10線)，同步見SlowSTC(14,3)都已見由低位回升，於是(63080)encore，以當時高低位$0.46/$0.41計，平均買入價為$0.0435。
及至官員打完針(無咁快有副作用嘅)暫時未有事，兼且林鄭行出嚟呼籲大家接種疫苗，恒指跌得要幾深有幾深，最後尾市再創Day low，跟住先見停，完美演繹「You針，市Jump」。然而，喺打完針之後，於五分鐘圖上見恒指250分鐘線(5分鐘圖 X 50線)遇阻，同步SlowSTC(14,3)都見高位回落，呢個時侯(63080)encore收工，按2點45分至2點55分遇阻回落呢段時間計，(63080)高低位做過$0.063/$0.047，平均沽貨價為$0.055，呢一注多得走勢夠急夠狠，都有26.4%賺幅。
依家10點12分，恒指今早低開後倒升再回落，聊天室裡頭已走一轉恒指牛，再開恒指熊，只係依家要小心條50分鐘線會唔會成為今日恒指嘅支持。
Anyway，今日最觸目莫過於滙控(00005)公布業績，市場早已預期滙控會恢復派息，管理層一早都爆響口話會派番息，問題只係派幾多啫；BTW，行業前景或者先係市場最關心嘅另一個課題：就嚟連津巴布韋都有針打嘅時侯，疫情過去，百業興旺，咁銀行作為百業之母，生意又會唔會好返啲？
滙控今朝高開後一度升至$47.95(截至10點20分止)高位後稍作回落，如今五分鐘圖上連保歷加通道中軸都未到，SlowSTC(14,3)就率先彈起，順勢炒業績，何樂而不為？滙豐牛(66027)，收回價$44.77，同現價有5%差距，目前只係擔心小時圖上見SlowSTC(14,3)超買位回落啫，還望業績有驚喜，推返高個股價，令保歷加通道Keep住拓闊啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
