今日年三十晚，先祝各位讀者新年進步！身體健康！萬事勝意！來年買乜贏乜！直頭要升有Call！要跌有Put！贏到連自己都怕為止！
今日港股得半日市，望返噚日恒指喺下晝猶如一潭死水，及至3點半打後忽然瞓醒；至於噚日揀出嚟嘅吉利(00175)走勢都係差唔多，等到下晝3點20分至3點35分，終於見到吉利五分鐘圖上SlowSTC(14,3)落到超賣水平，呢個時候噚日揀隻Call(28502)終於有位出場，按當時高低位都係$0.35。
去到臨收市時見吉利股價隨市上行，喺五分鐘圖上SlowSTC(14,3)都由嚴重超賣水平回升至超買位置，但係(28502)就奇怪地證價完全無郁過咁滯，唔過夜(28502)可以打個和輸手續費離開；但如果諗住博一博過夜嘅話就麻煩啦，事關今朝恒指輕微低開後，吉利都見低開，都已經對(28502)心知不妙，及至正式開市後，吉利跌勢頗急，再睇其他分鐘嘅圖都見吉利SlowSTC(14,3)由超買回位落中，只怪呢一注太博，唯有等吉利彈高返少少，先至將隻(28502)走人。
似乎我都係仍然擺脫唔到「個股贏面五五波」呢個宿命(呀...有追開呢個欄嘅就會知道)，我都係去返恒指度做Day trade算數。依家9點50分，恒指今朝低開40零點時已叫定聊天室戰友們搶閘追熊，只係喺五分鐘圖上於9點45分出現「錘頭」+ SlowSTC(14,3)到超賣回升，所以大家爬格仔恒指熊成功落袋，只係等SlowSTC(14,3)低位確認回升時先再出手恒指牛(52600)，收回價29288點，槓桿比率約42倍，希望快手追返一注之餘兼且彌補隻(28502)嘅損失啦。
今日【輪證下半Part】當然無啦！而【輪證贏家】同【輪證下半Part】都會同大家齊齊過年，並於下個星期二，即2月16日先至再同大家見面！希望大家牛年行大運，初五見！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
