追咗小米(01810)兩日，本以為佢會順住個市嘅氣勢，行完「三角形」之後再配SlowSTC(14,3)超賣作向上突破，但都已經提醒自己小米「三角形」之時，亦係有條20天線擋路之日，結果噚日就被條20天線set roadblock，$29一度失守觸發咗止蝕位，輸咗個手續費同啖氣；嬲嬲地信唔信用你個核突、醜樣、出咗「烏雲蓋頂」月線圖開你Put呀嗱，哼！
依家10點16分，恒指今朝早低開逾200點後走勢反覆，至依家倒升76點，做緊29383點。本來打算都係用五分鐘圖配合Swing trade出恒指牛熊，但今日實在太難轉身，不過都好彩快手一早揀定埋隻平保(02318)好倉喺聊天室度，仲講明用小時圖至日線圖做trade。
點解？因為日線圖已經見到平保由1月20日嘅高位$103.6向下行至噚日低位$88.9，累跌逾一成，而噚日低位剛好踩到100天線同保歷加通道底，同步SlowSTC(14,3)都喺嚴重超賣水平回升。
今日平保再出多支陽燭彈起，反映100天線同保歷加通道底雙線支持；再加上唔止SlowSTC(14,3)超賣回升，就連14RSI同埋MACD都係見低回升嘅跡象，只係小心10天線($93.77)會成為阻力。
平安牛(58255)，收回價$86.18，同現價有逾7%差距，逾13倍槓桿其實day trade都可以，只係今朝早平保一開市就炒咗上去。依家10點41分，喺五分鐘圖上見到平保慢慢行緊返落嚟，安全嘅當然等五分鐘圖SlowSTC(14,3)回到落超賣位先至入場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
