今日開始至下周五(1月22日)，高盛、摩根大通及摩根士丹利旗下合共484隻輪證產品將以提供單邊買入價方式，提供有限流通量；假如投資者唔沽貨，發行商會根據一個方程式，計算出一個「提早終止金額」，償還比投資者。
至於係邊484隻產品，大家可以上港交所(00388)披露易網易搵返公告睇返，當然都可以打電話問發行商啦，呢個應該係最快嘅方法，每間發行商都有熱線，可以上返發行商網站睇返。(呼籲完畢)
依家10點8分，恒指今早低開10幾點之後一度下插逾90點，其後跌幅收窄，喺5分鐘圖上見到恒指於9點45分出咗粒「十字星」後就轉勢，依家恒指已經由跌轉升83點，報27991點，仿佛同28000點講「I will be back」。
去到依家10點17分，恒指升幅已大為縮減至得返升20幾點，點數唔算多但真係chok過過山車，對 day trade/爬格仔嘅老散嚟講的確有難度，不過已經喺聊天室放定三個唔同組合嘅<追渣沽策略>，以大家每日都有提升嘅睇圖功力，相信問題不大。
睇睇恒指牛熊證街貨先。今日見牛熊證一層新增街貨層，最貼價層推高至27600至27699點，呢度有相當於45張期指。而第二層27500至27599點就有相當於586張期指，明顯反映資金短期仍然看好恒指。
至於熊證方面，最貼價層為28100至28199點，有相當於132張期指，由28200至28299點呢一層開始向上數至28500至28599點，閒閒地都有逾500張期指喺度，咁重貨我都唔知你係喺度等開餐，定等被人開餐。
依家10點41分，恒指進一步上行且升過百點，最高暫見28025點，由於恒指今日太chok，於是拉長少少用咗小時圖嚟睇走勢，會見到小時圖上由上年12月28日至今，保歷加通道中軸一直成為小時圖嘅彈床位，就連馬SlowSTC(14,3)都唔夠佢鬥；再加上下注十次有九次都係街貨贏，恒指牛(51751)，收回價27450點，同現價有逾500點差距，策略同噚日一樣，等5分鐘圖發出買入訊號時先再追。(51751)槓桿有接近50倍，所以都只係DT用；進取者可唔可以吼5分鐘圖回落到50分鐘線(5 x 10線)就進場？你爬得快我唔會阻你架，係咪先？
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
