繼續WFH的日子,怕且要直至疫情緩和至得,聖誕節應該都好難出去街玩,希望過聖誕之後,到農曆新年會好番啲啦。
依家9點27分,恒指完咗U盤,開市報26870點,升34點,見恒指5分鐘圖上SlowSTC(14,3)都被搶高至超買水平,睇嚟開市時先有有一堆過恒指牛收網,快手再出恒指熊做Day trade。
未正式開市就先望望牛熊證街貨圖,今日見牛熊兩邊都無新增街貨,以恒指目前口價計已經踩咗入熊證街貨區,因為熊證最貼價層為26800至26899點,呢度有相當於221張期指;至於牛證最貼價層為26500至25699點,呢度有相當於132張期指。不過,最吸睛嘅仍然係熊證街貨層,的確都有講咗兩個星期咁滯,27000點以上嗰幾層過千張期指仍然喺度,暫時未有借口可以衝上去動佢一條頭髮。
依家9點39分,恐怕過夜恒指牛走得比較狼狽,恒指開市嗰日價已經係全日高位。到依家9點48分,真係10分鐘都無就向下殺咗325點,做緊26510點,最低暫時見過26495點。恒指由本身企喺熊證街貨嘅第一層,就嚟上到第二層啦,都唔上,就掉頭向下殺牛。再到依家10點10分,恒指已經將第一層牛證街貨26500至26599點全數殺晒,暫時最低見過26402點,都真係可以將第二層牛證26400至26499點直接當佢死埋,以26300至26399點為牛證首層算。
日線圖上見恒指今日支陰燭都唔細,截至依家10點13分止連埋上個星期五(12月4日)計,生咗個「穿頭破腳」出嚟,係一種向淡嘅訊號,兼且今日仲穿埋20天線(26494點),不過大市咁跌法,恒指日線圖上條SlowSTC(14,3)都只係落返去中軸水平;恒指熊(68086),收回價27300點,同現價有逾800點差距屬安全。
承上個星期所講,清假行動繼續,今個星期輪到聽日放假,所以【輪證贏家】同【輪證下半Part】都會暫停一日,聊天室同Patreon繼續營業。
The last but not the least,聊天室戰友Hazel生日,Happy Birthday!祝你買乜贏乜!為所欲為!
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon/秒投聊天室:輪證贏家