長官出場果真非同凡響，一份《施政報告》由噚日朝早11點開始宣讀至1點鬆啲放飯，再到下晝3點半有記者會到都唔記得完時完場，恒指就噚日先搶高到27000點樓上迎接《施政報告》，繼而再將升幅收窄咗300幾點，至全日升不足100點收市。
到今日再有行政長官施政報告答問會，會唔會又係出恒指熊嘅機會？開恒指5分鐘圖見恒指開市至依家10點5分都沿住保歷加上升通道運行，只係問題在於條保歷加通道實在太窄，行極都只係講緊幾十點嘅事。
依家10點25分，花咗20分鐘喺個股方面，最後都係失望而回，只得一隻網易(09999)叫做有少少睇頭，大裂口低開後處終$144附近橫行，同步SlowSTC(14,3)都被搶低至超賣再超賣水平，只係咁啱喺10點20分左右徘徊喺呢幅圖嘅時候一支大大地嘅陽燭向上升穿50分鐘線(5X 10線，10點31分報$144.17)，只係近期網易實在無咩驚喜，再加上恒指一潭死水，今日都係觀戰算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
