噚日個市抽到咁勁，更係唔執輸揀隻恒指牛(54809)搵個位落場啦，撞正噚日下晝打緊隻[下半part]時，恒指5分鐘圖SlowSTC(14,3)落到超賣位(大約1點45分)，當時(54809)證價做緊$0.081，揸貨揸到下晝3點20分至收市前，恒指5分鐘圖SlowSTC(14,3)全程都處於超買至嚴重超買位置，按呢段時間(54809)高低位做過$0.09/$0.087，平均價為$0.0885，一計之下一個晏晝平均賺幅有9.3%，都OK呀。
今日喺巴士上等U盤做完報開市價，奇怪，仲以為自己電話個鐘遲咗，點解去到9點22分都係未有恒指開市價，但反而國指就有嘅？去埋隔離左右啲報價App情況都一，問過大家個鐘嘅時間都係差唔多，咁就估到應該係最終端嘅data provider出現問題，去到28分先見到恒指微升5X點開市。依家10點30分，恒指暫時最高見過25799.97點，點解要特登提嗰0.97點呢，就係因為呢0.97點，所以熊證第一層街貨25700至25799點全數死亡，呢度有相當於495張期指。
依家10點35分，日線圖上見恒指一粒小陰燭掛咗喺相對高嘅位置，同步見SlowSTC(14,3)都上到超買水平，不過%K線始見有橫行跡象，情況就似係等緊%D線上埋嚟之後就雙雙向下，BTW今日係恒指第二日升穿保歷加通道頂部，即使保歷加通道頂部拓闊中，但呢個走勢恒指唔落都似係橫行去住，等走返入保歷加通道裡面再算。恒指熊(53988)，收回價26650點，同現價有逾900點差距，吼5分鐘圖SlowSTC(14,3)上到超買先至落場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
