親愛嘅鄰里，你好！我喺你嘅鄰里，係咁嘅，借問聲你會裝修幾耐呢？唔怕你人多唔怕你沙塵滾滾(我都係閂埋度木門啫)，但其實你會鑽到幾時呢？我Feel到你鑽廚房耶，我個廚房同你個廚房只係隔一度牆咋Baby，我哋條煤氣喉就係呢度牆裡面，亲，请小心一点(呢個moment比平時停水停電更加想返公司)
今朝恒指開市報25055點，跌123點，晨早喺5分鐘圖上見SlowSTC(14.3)勢頭向下，且開市呢口價已經正式踩入恒指牛證第一層街貨25000至25099點，呢度雖然只係得82張期指，俾你再向下行多45點嘅話，咁就食咗個早餐。
依家9點29分，望住個恒指牛熊證街貨圖先。個圖今日出嚟係有啲特別，熊證重貨25800至25899點，有相當於888張期指(幾好意頭)，而牛證重街24600至24699點，有相當於770張期指，用呢兩層計中間位的話就係=(25800+24699)/2=25,249.5點，同噚日收市價25178點比就爭71.5點；但以今朝開市價計嘅話，就明顯走向牛證街貨層。
再計計兩邊由起點至重貨區沿路可以殺到幾多張期指街貨，牛證有相當於1849張期指，而熊證有相當於1745張期指，實數計的確係牛證吸引。
依家9點34分，恒指正式開市二話不說向下殺，至依家見24837點，跌341點；打完兩句說話唔夠，恒指連24800至24899點嗰層牛證都食埋，變相依家最貼價為24700至24799點，呢度有相當於228張期指，再落多一層就到重貨區24600至24699點。
恒指熊(56219)，收回價25800點，同現價有逾600點差距，換股比率10000，槓桿偏高；但5分鐘圖見依家似有跌定之勢，等SlowSTC(14,3)上返超買怕會等到2046都未等到，今日個勢...脆脆地中軸可能都值得一博。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
