噚日揀咗兩隻恒指熊(62899)同(69069)出嚟，終於守得雲開見月明，喺噚日大約下晝14點40分至15點15點，恒指5分鐘圖上SlowSTC(14,3)終於回落到超賣至嚴重超賣水平，(62899)同(69069)亦係Day trade走貨嘅時侯，按呢段時間(62899)同(69069)高低位計平均沽貨價分別為$0.0885同$0.129，再比對返噚日mark過三個可以入市嘅平均買入價，平均賺幅分別為4.1%至16.4%，以及5%至10.7%，以噚日恒指表現計，只能夠話係悶聲發財。
收市見恒指收「十字星」，100天線又再次發揮支持力度，今朝果然不負所托，一舉向上係咁掃，情況同今朝落街買《蘋果日報》差唔多(我師兄老樓仲同我講今朝有人一口氣買200份，真係一世人都未試過一次買200份報紙)
依家9點43分，恒指已經由10天線(24737點)附近爆咗上去20天線(24900點)同50天線(24884點)附近位置，最高暫時見過24892點，同熊證第一層街貨24900至249999點只差8點，跟手有啲回，無計，你見5分鐘圖條SlowSTC(14,3)搶高到氣都咳就知佢要回一回，抖一抖。
再望埋恒指牛熊證街貨圖，同噚日一樣無新增街貨層，不過明顯見到熊證第一層24900至24999點呢度有大量新增街貨，將成層街貨迫至上859張期指，亦係重貨區。截至依家10點1分，恒指最高暫時做過24919點，其實已經代表進入咗熊證第一層街貨範圍，即使依家5分鐘圖見恒指回落，但係向上殺呢層有逾800張期指街貨嘅氣焰實在太強，再者25000至25099點都有2XX張期指街貨喺度，一舉殺晒的話都只不過係將之前呢兩日跌勢收回失地，甚至可能係為聽日騰訊(00700)派績鋪路呢。
恒指牛(58923)，收回價24150點，低街貨，高槓桿，成交活躍。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB：輪證贏家
