侵侵簽署香港法案後,中國採取反制措施,雖然所謂反制措施係得啖笑,但雙方都擺出強硬態度,侵侵甚至表示中美貿易談判佢唔急,等到明年11月總統大選完結後先達成協議更好,市場對中美貿易談判進展即變悲觀。另一方面,本地經濟持續惡化,IHS Markit 本港11月PMI跌至38.5,係2003年沙士以嚟最差,而財爺日前更表示嚟緊庫房將出現赤字,港股自然轉弱。
恒指低開319點後,跌幅曾收窄至199點,見過26191點半日高位,但PMI出爐後,恒指跌幅再度擴大,最多跌396點,一度跌穿26000點,低見25995點半日低位,創10月11日以嚟新低,其後喺二萬六水平爭持。恒指中午報收26077點,跌313點;國指報收10255點,跌99點。
重磅藍籌股全線下跌,友邦(01299)半日跌1.6%;大笨象(00005)跌1.4%;平保(02318)亦跌1.5%,本來噚日個市先低後回穩,收窄跌幅之際,唔少重磅股都似搵到支持,可惜今日個市又踩一腳,搞到本來似要營造反彈嘅重磅股,又轉番弱勢。其他重磅股普遍亦跌近1%。
騰訊(00700)之前一直上唔番340元樓上,已知走勢有啲濕滯,今日仲要跌穿埋330元,睇嚟短期殺落320元前幾次低位機會唔細。至於其他科網股大部份都係跌,阿里巴巴(09988)半日跌1.5%,連跌四個交易日,今日更跌穿190元,傷咗唔少捧場客嘅心。之前阿Man講過,阿里係長線投資嘅對象,不過呢,一掛牌股價就升到巴巴聲,高追當然有一定風險,高追就預咗要再坐一會,暫時希望股價盡快190元,否則可能跟埋個市一齊尋底。
中美貿易談判可能隨時泡湯,而美國唔知近期搞邊科,竟然喺普天同慶嘅聖誕節前,又四圍開貿易戰線,對貿易戰敏感嘅股份梗係捱沽。萬洲國際(00288)半日跌2.7%;而手機設備股當然捱沽,舜宇光學(02382)半日跌3.5%,係最大跌幅藍籌股。瑞聲(02018)半日跌1.1%,其他手設股普遍腳軟。
由於貿易戰再現變數,資金避險情緒升溫,而全球股市均見下跌,推動金價回升,刺激金礦股逆市上升。不過金價走勢暫時唔見得有乜突破,暫時仍然喺1450至1550之間上落,金礦股一日半日上升,升勢未必持久,高追有一定風險,整個板塊都係打游擊算數。
至於晶片股有炒作,由於貿易戰再度升溫,令市場相信中國會轉用更多國產晶片,晶片股逆市向上,之前阿Man喺其他平台推介過嘅華虹半導體(01347),半日升6.4%,盤中曾見15元,但呢個位似見阻力,令股價從盤中呢個高位回落。至於其他晶片股亦有追捧。對人民幣走勢敏感嘅內房股,今日隨人民幣離岸價回軟而下跌,而重資產內房股所受壓力較大。人民幣好內房好,人仔一腳軟,內房無運行。
麥狄文
(徐狄怡‧證監會持牌人)