相信大部分嘅香港人噚日一大清早起身,第一件事除咗刷牙洗面之外,就係落街排隊投票,無論條龍排幾耐都好,都要用自己手上嘅一票嚟幫自己發聲。我個區好啲,排咗半個鐘頭就完成晒所有程序;今朝起身睇新聞就見到自己所投嘅侯選人,終於由社區主任「升職」成為區議員。當然其他區仲有其他令人振奮到要開香檳,甚至請小鳳姐出場啦!
今日港股都陪香港人振奮一番,恒指開市先高開278點,開市報26700點;到正式開市之後,就見恒指一支箭咁向上飆,依家9點58分,恒指現報27015點,升420點,最高做過27043點。日線圖上今日一個裂口向上彈,唔單止將恒指推返上27000點水平之上,仲順便收復埋10天線(26703點)、20天線(26992點)、50天線(26651點)同100天線(26825點);收得到條20天線,亦即係喺保歷加下降通道爬返上去上升通道啦,但如果聽日係成粒燭完全企喺條20天線之上嘅話,咁就真係perfect啦!
睇埋恒指牛熊證街貨圖,今日恒指一彈一口氣殺咗三層熊證街貨,呢三層夾埋都只係相當於652張期指。都真心覺得有啲奇怪,以上個星期五(11月22日)恒指收報26595點計,假設今日大市係下行400點嘅話(用返同一走勢點數,只係向相反方向作假設),其實會落到去26195點,以同一牛熊證街貨計,其實都係殺咗頭三層牛證街貨,而三層牛證街貨相當於691張期指。張數上其實係同熊證依家所殺一到嘅差唔多,唔通就係因為上星期五嗰粒暗示轉勢嘅「十字星」令到成件事180度轉變?嘿!果然一粒燭都不能看少!
依家盤口咁開法,就梗係似繼續上行有利啦反正都踩正入熊證街貨區啦;BTW,畫畫吓個圖又好似畫到個「小雙底」出嚟喎,再開多次恒指5分鐘圖睇,依家10點16分恒指再做多次今日高位出嚟,而SlowSTC(14,3)已經頂到嚴重超買水平,追升嘅不如比啲時間個市冷靜一陣先啦,恒指牛(60758),收回價26668點,同現價有近340點差距,同一收回價中最高槓桿,或者今日稍後時間Day trade用得著呢。
作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。
電郵:gladyshan@gmail.com;FB:輪證贏家